¿Puedo sacar al perru o salir al parque? Duldes cotidianes sobro’l coronavirus

El director del Centru de Coordinación d'Alertes y Emerxencies Sanitaries, Fernando Simón, responde a les entrugues de la ciudadanía sobro'l Covid-19

0
269
Duldes cotidianes sobro'l coronavirus
Sacantes que teas en cuarentena o aislamientu inflexibles, puedes salir a dar un paséu / Pexels

La situación d’escepcionalidá provocada pola pandemia del nuevu coronavirus nel mundu ta provocando situaciones nunca vistes hasta anguaño. La peor situación hasta agora n’Europa ta dándose n’Italia, onde hai dellos díes decretóse’l pieslle del país pa tratar de contener l’andanciu. España, el segundu país del continente con más casos de coronavirus del vieyu continente, recomendóse la suspensión de l’actividá en toles escueles del país. Una midida que, n’Asturies, ta aplicándose dende esti mesmu vienres. Madrid, La Rioxa y el País Vascu son, pel momentu, los principales focos de la epidemia. Precisamente, nesti últimu territoriu decretóse esti vienres l’estáu d’emerxencia sanitaria. Ente esta situación, son munchos los ciudadanos que s’entruguen cuálos son los pasos a siguir. Estes son les recomendaciones del Ministeriu de Sanidá:

Pautes básiques

¿Son más efectivos los xeles antisépticos o llavase con agua y xabón?

Valen les dos opciones. La xente piensa que los productos bien sofisticaos son meyores pa matar a los virus, pero nun queremos matalos, sinón quitalos de la mano. Una bona hixene de les manes asegúranos l’arrastre, y obviamente depositar nel llugar afechu la servilleta cola que llimpiemos.

¿Tengo de tomar dalguna midida concreta si toi en contactu con persones procedentes de zona de riesgu?

La primer midida ye tar seles. Los madrilanos por ser de Madrid nun son persones de riesgu, como tampoco lo son los de Haro o de cualesquier otra zona. Les persones de riesgu son les que tienen sintomatoloxía y pueden tar espuestes al virus. Les persones sanes ensin nenguna sintomatoloxía nun son persones de riesgu. Amás, polo xeneral la enfermedá presenta un cuadru leve y benigno.

La pareya d’un compañeru de trabayu da positivu. A él píden-y quedase en casa pero a mi naide me díxo nada…

Un contactu d’un contactu sanu nun ye persona de riesgu. Hai que controlar la temperatura, ver si hai mucosidad y tos seca, y en casu de tener síntomes, informar nos teléfonos puestos a disposición. N’Asturies, el 112. Va haber más casos, pero van aisllándose y curando. Ye bono ser precavíu, pero nun tener mieu; esto fai qu’actuemos mal y la ciudadanía nun puede vivir apavoriada tol tiempu.

Si toi en cuarentena, ¿puedo sacar al perru?

L’aislamientu ye pa persones enfermes y la cuarentena pa sanes. Les cuarentenes pueden ser flexibles según los protocolos de cada comunidá en cada momentu. Si tas en cuarentena inflexible por una razón sólida, tienes que garantizala.

Coronavirus, embaranzu y lactancia

¿Cómo afecta’l virus a les muyeres embarazaes y a los fetos?

Hasta agora nun hai información de consecuencies en ñácaros nacíos de madres infectaes. El procesu d’infección y sanamientu ye curtiu, polo qu’en principiu nun tendría d’afectar al fetu, pero hasta agora les informaciones nun son 100 % segures. Paez que la probabilidá de tresmisión ye bien baxa, pero non puede escluyise qu’en dalgún casu concretu pudiera asoceder.

¿Puede tresmitise el coronavirus por lactancia materna? ¿Qué faigo si tengo síntomes?

Nun hai muncha información sobro la posible tresmisión al traviés de la lactancia materna, igual que sobro tresmisión mientres l’embaranzu. Los pocos estudios qu’hai son contradictorios. Si tas dando’l pechu lo más importante agora ye evitar que, en casu de que tengas síntomes, el to ñácaru pueda arimase. Unu de los mecanismos ye caltener distancia, nun averar la cara o la cabeza al bebe cuando teas dando de mamar. Y según la edá del ñácaru, si ta próximu al treslleche y tomar d’alimentación alternativo, quiciabes adelantrala unos díes tampoco sería mala idea.

Neños y neñes

¿Por qué se mandó 15 díes a los escolares a casa?

Anque los neños nun se ponen graves con esta enfermedá, sí puede trasmitila ente ellos y a les families. Cola decisión de cerrar los colexos buscóse amenorgar dichu grau de tresmisión. Si evitamos l’amiestu de neños nes escueles amenorgamos el riesgu nes families. Esto asocede nes epidemies de gripe tolos años xustu enantes de les vacaciones de Navidá. En cuanto empiecen les vacaciones hai un descensu de la tresmisión de gripe y al volver al colexu en xineru, vuelve medrar. Con esta midida quíxose retardar la epidemia y que los servicios sanitarios puedan afaese y atender más progresivamente a la demanda.

¿Tienen que tar los neños tol tiempu en casa?

Non necesariamente, pero sí ye ciertu que nun convien que vaigan a un eventu multitudinariu. Ye importante, na midida que pueda evitase, que los neños queden al cargu de padre o madre, y non de los güelos, que son un grupu de riesgu. Por eso tánse habilitando midíes p’ayudar a les families a faer frente a esta situación.

Tresporte y desplazamientos

¿Ye peligroso dir en tresporte públicu?

Les midíes que se tomaron en Madrid y otres provincies amenorguen l’usu de los tresportes. A cencielles trátase de caltener les distancies. En Madrid hai 11 casos por cada 100.000 habitantes y tán aisllaos. Nun hai que tener un mieu escesivo, pero sí tomar precuros.

¿Podemos viaxar?

Hai unu encamientu importante de nun viaxar si nun ye necesariu, sobremanera dende les zones significatives, porque aumenta’l riesgu de tresmisión. Pel momento adoptáronse midíes temporales que se van a reevaluar. Cuanto meyor s’apliquen nestos 14 primeros díes, más probabilidaes hai de que consigamos controlalo llueu. Les instituciones tán implementando, y caún de nós, individualmente, tenemos de cumpliles por que esti periodu dure lo menos posible; si son 14 díes meyor qu’un mes.

¿Son seguros los desplazamientos a Madrid y otres rexones de riesgu?

L’encamientu xeneral ye que, si puede evitase, nun se faigan viaxes innecesarios a rexones de riesgu. Pero la movilidá nun s’acutó. Lo qu’importa ye controlar el movimientu masivu de persones que pueda suponer un riesgu importante para otres comunidaes o países. Madrid ye una comunidá de la qu’entra y sale una gran cantidá de población todo los díes. Llindar esos viaxes ye una responsabilidá sobremanera de los mesmos madrilanos, pero tamién de les persones que nun precisen movese hasta Madrid.

Protección a los grupos de riesgu

Vivu con una persona mayor, del grupu de riesgu. ¿Qué puedo faer pa embrivir les posibilidaes d’andada en casa?

Si esa persona nun sale enforma, ta relativamente protexía. Lo que tienes de faer ye protexete tu de les posibles esposiciones: nun dir a eventos masivos o llugares con concentración de persones enfermes. Y si empieces con síntomes, busca alternatives al cuidu del to familiar.

¿Qué midíes tienen de tomase pa les persones asmátiques?

Les enfermedaes respiratories cróniques son un factor qu’amonta’l riesgu. Lo fundamental ye tomar midíes d’hixene y evitar el contactu –caltener la distancia a unu o dos metros– con persones que presenten síntomes o coles sos secreciones na superficie.