La Conseyería d’Educación propunxo pa la ufierta d’empléu públicu (OEP) d’anguaño un total de 519 places d’ingresu nuevu nos cuerpos de Secundaria. Esti ye’l resultáu de sumar la tasa de reposición del 110 % autorizada pal 2021 y places ensin axudicar nel procesu d’oposiciones que se resolvió en xunetu. A esta cifra habría que sumar otres 150 más de promoción interna, ente les qu’hai 5 del cuerpu d’inspección.
El director xeneral de Personal Docente, Miguel Sariego, esplicó güei na mesa xeneral de negociación de la comunidá qu’esti volume de puestos púdo algamase en realizando un análisis rigorosu de les cifres del área de personal.
Sariego insistió nel compromisu de l’Alministración cola meyora de les condiciones del profesoráu. “La conseyería ta esforciándose por amenorgar la tasa d’interinidá y, asina mesmo, ta siendo respetuosa col procesu d’estabilización que tenemos pendiente. Tamos a la espectativa de ver cómo va ser esti procedimientu”, esplicó.
Educación presentara primeramente una ufierta de 479 puestos d’ingresu nuevu. Esti datu correspondía a la reposición de les 436 places que quedaron vacantes nel 2020 por xubilaciones, fallecimientos y escedencies ensin reserva de plaza, y al 10 % adicional dexáu pola llei de presupuestos p’anguaño.
Tres la primer xunta, celebrada ayeri, el departamentu qu’encabeza Lydia Espina realizó un análisis nuevu de los datos y optó por incorporar 40 places que quedaren ensin axudicar de la ufierta pública d’empléu del 2019, resuelta nel procesu selectivu celebráu esti branu.
Del total de 519 places d’ingresu nuevu, 40 acútense pa persones con discapacidá reconocida.
