– Los cuatro paraes pedagóxiques van ser en payares, avientu, febreru y mayu
– La conseyería caltien la fecha d’entamu y final del periodu lectivu unificada dende Infantil a Bachilleratu
La Conseyería d’Educación aprobó ayeri’l calendariu escolar pa’l próximu cursu 2023-2024. La principal novedá ye que se contemplen periodos de respiru en tolos trimestres: dos nel primeru, que ye’l más llargu, y una parada nos otros dos.
La conseyera d’Educación, Lydia Espina, robló’l resolvimientu col calendariu, que yá ta disponible nel portal Educastur y que s’unvió al Boletín Oficial del Principáu (Bopa). Amás, unvióse un boletín informativu a tolos centros d’enseñanza.
El nuevu cursu va empezar el 11 de setiembre y va rematar el 21 de xunu de 2024. Per segundu añu consecutivu, caltiense la unificación de la fecha d’entamu y final n’Infantil, Primaria, Secundaria y Bachilleratu, que s’enllantó tres la supresión de los exames de recuperación de setiembre.
El nuevu calendariu establez un total de 177 díes lectivos –distribuyíos en 68, 53 y 56 por trimestre-, a los qu’hai que descontar les dos xornaes ensin actividá escolar qu’establez cada conceyu coincidiendo coles sos festividaes locales.
Les vacaciones de Navidá sumen 16 díes (del 23 d’avientu al 7 de xineru) y les de Selmana Santa, 10 (del 23 de marzu al 1 d’abril).
El primer trimestre cunta con dos descansos pedagóxicos de cinco díes, del 1 al 5 de payares y del 6 al 10 d’avientu, estendiendo les tradicionales pontes de Tolos Santos y de la Constitución. Nel segundu, la parada previóse nel mes de febreru y consta de cuatro díes: del 10 al 13, con dos xornaes de descansu adicionales tres la fin de selmana.
Como novedá, nel próximu cursu introduzse un respiru nel últimu trimestre para compensar la distribución de les xornaes lectives, yá que la Selmana Santa de 2024 va ser en marzu. En concretu, aprovéchase’l festivu del 1 de mayu para entamar una parada hasta’l domingu, día 5.
A lo último, el 12 d’ochobre va ser l’únicu día festivu que nun coincide con periodos de respiru nin con una ponte.
La directora xeneral de Planificación ya Infraestructures Educatives, María Elena Arango, axuntóse esta mañana coles organizaciones sindicales, les asociaciones de madres y padres (AMPAS) y los comités de direcciones de Primaria y Secundaria tantu de la enseñanza pública como de la concertada. Arango destacó que se caltien la unificación del día d’empiezu y finalización del cursu, “porque foi daqué bien valorao por tola comunidá”.
“El calendariu del próximu cursu xunta’l calter pedagóxicu, al averar les postures de tola comunidá educativa, y l’equilibriu ente trimestres, polo que contribúi claramente a un meyor desenvolvimientu y rendimientu del alumnáu”, añedió la directora.
