La Conseyería d’Educación acaba de publicar la llista de los 78 colexos ya institutos escoyíos pa desenvolver el programa PROA+, un plan que tien como oxetivu algamar l’éxitu escolar de tol alumnáu, faciendo especial fincapié naquel que s’atopa en situación de vulnerabilidá educativa. L’Alministración concibió esta actividá como un mecanismu d’ayuda pal tresformamientu de centros con enseñances nel períodu 2021 a 2024.
Educación escoyó centros d’Infantil, Primaria y Secundaria que cunten con, siquier, un 30% d’alumnáu vulnerable, mesmo que centros rurales o allugaos en zones ablayaes o con gran dispersión de la población. Nel casu de los públicos, utilizóse l’índiz socioeconómicu como criteriu d’ordenación pa ellaborar la llista definitiva de beneficiarios, ente que nos concertaos valoróse’l proyectu presentáu.
La conseyería, que publicó güei la resolución na web oficial de Educastur, utilizó esti baremu pa dotar al procedimientu de la máxima oxetividá y tresparencia, con unes riegles básiques idéntiques pa toos. van subvencionase aquelles actividaes que se planien hasta’l 31 d’agostu de 2024.
El destinatario últimu de les actividaes ye l’alumnáu d’Infantil, Primaria, Secundaria y Bachilleratu más vulnerable educativamente nun sentíu global. Abarca dende estudiantes con necesidaes asistenciales, escolares o socioeducatives a aquellos otros que presenten altes capacidaes, dificultaes específiques d’aprendizaxe o que s’incorporaron de forma tardía al sistema. La so finalidá ye baltar les barreres que condicionen les posibilidaes d’éxitu.
Los centros han cuntar cola implicación espresa de, siquier, el 60% del claustru de profesoráu, desenvolver un plan estratéxicu de tresformamientu y concretar les actividaes cursu a cursu hasta’l 2023-2024. Amás, van tener que designar a una persona de la coordinación del programa y realizar la correspondiente xustificación técnica y económica del importe asignáu pa la so execución. Podrán entamase inclusive actividaes branices, fora del calendariu lectivu.
Esti programa ta financiáu pol Ministeriu d’Educación y Formación Profesional y cuenta tamién con recursos del Mecanismu de Recuperación, Tresformamientu y Resiliencia (MRR). La primer partida, correspondiente al cursu actual, va ingresase antes de fin d’añu. Tamién va permitir la contratación d’un docente de refuerzu a media xornada.
Amás del PROA+, la conseyería pretende sacar en 2022 una convocatoria de proyectos d’innovación educativa, tanto pa la rede pública como pa la concertada, que va sirvir de complementu.
