La Conseyería d’Educación empecipió güei una campaña p’afalar la matriculación del alumnáu de Primaria, Secundaria y Bachilleratu en llingua asturiana y n’eonaviegu en centros sosteníos con fondos públicos pal próximu cursu. La principal novedá ye qu’esta iniciativa va desenvolver en dos folaes coincidiendo colos periodos de solicitú de places y d’inscripción.
La campaña publicitaria, que lleva por lema Apúntome, apuntámoslos, va espublizar en medios impresos, dixitales y nes redes sociales Facebook y Instagram. D’esta miente, compaxínense los formatos tradicionales coles nueves canales de comunicación utilizaos pola mocedá.
La primer folada empieza güei y va enllargase hasta’l 21 d’abril, un día antes del entamu de la fase d’almisión, que va permanecer abierta hasta’l 7 de mayu. La segunda va ser del 13 al 23 de xunu. Pela so parte, el periodu de matriculación va desenvolver del 19 al 26 de xunu pal alumnáu d’Infantil y Primaria, y del 1 al 12 de xunetu pal de Secundaria y Bachilleratu.
La iniciativa incide nel valor de la diversidá llingüístico y cultural, mesmo que nos beneficios qu’apurre estudiar les distintes llingües d’Asturies nes distintes etapes educatives y na so relación coles señes d’identidá autóctones. Tamién inclúi un lema afechu al públicu oxetivu, que sorraya la ufierta nes enseñances obligatories y el Bachilleratu.
La campaña diríxese espresamente a la comunidá educativa y tamién a tola ciudadanía, con un diseñu visual curiosu pa la población más nuevo y nun llinguaxe cenciellu, afechu pa tolos públicos y non sexista. Ye moderna, dinámica y acorde con una sociedá que favorez la convivencia, la integración y les tradiciones. Cada acción utiliza la etiqueta #educallingua.
Amás, esta iniciativa promocional dexa claro que la llingua asturiana ye d’ufierta obligatoria nes etapes educatives de Primaria, ESO y Bachilleratu y que ta abierta a cualesquier estudiante interesáu en cursala. Tamién tien presente la igualdá, la diversidá, la equidad y la calidá educativa.
