La Conseyería d’Educación trabaya para entainar les sustituciones del profesoráu nel picu epidémicu de covid. L’Alministración ellaboró una resolución na qu’entama un procedimientu estraordinariu, por aciu llamaes telefóniques al personal interín que forme parte de les llistes o les bolses. L’oxetivu ye que puedan incorporase nel plazu de 24 hores.
El documentu establez los estragales d’ausencies que tendrán de algamar los centros, en función del tamañu de los sos claustros de profesoráu, para llegar a esti llamamientu esprés, según se recueye nesta tabla:
Estragales
| Claustru | Númberu ausencias |
| Hasta 9 docentes | Más de 2 places |
| Ente 10 y 25 docentes | Más de 3 places |
| Ente 26 y 50 docentes | Más de 4 places |
| Ente 51 y 75 docentes | Más de 6 places |
| Con 76 o más docentes | Más de 9 places |
El Principáu va axustar el próximu llunes coles organizaciones sindicales el nuevu procedimientu, que se va habilitar en paralelo a la convocatoria ordinaria del personal interín, que va siguir publicándose a los martes, acordies col calendariu presentáu pola conseyería n’avientu.
El llamamientu esprés, qu’en principiu se va caltener válidu un mes, ta pensáu para los centros que tengan un númberu eleváu d’ausencies, sumaes tanto les causes ordinaries como les venceyaes al coronavirus. El restu va siguir por aciu l’ordinariu.
Esta convocatoria escepcional va entamase trés díes a la selmana: llunes, martes y vienres. Toes aquelles places publicaes que nun se puedan cubrir a lo llargo de la xornada, siguirán ufiertándose pel mesmu procedimientu na siguiente.
Les direcciones de los centros que cumplan los requisitos para aportar a esta nueva vía tendrán d’unviar un corréu electrónicu antes de les 10 de la mañana de los díes con convocatoria estraordinaria. Les places que s’incluyan van apaecer publicaes na web d’Educastur primero que s’empiecen a realizar les llamaes telefóniques al personal interín.
