La Conseyería d’Educación publicó güei un calendariu con toles convocatories del personal interín hasta final de cursu. Esti cronograma va ser el que se siga hasta’l mes de xunu. L’Alministración señala que solo se van modificar estes feches por dalguna causa non prevista pero que, de toles maneres, va comunicase con abonda antelación.
La Dirección Xeneral de Personal Docente ellaboró per primer vegada un calendariu pa llargu plazu, qu’inclúi tantu los díes de convocatoria como los d’axudicación, col enfotu de otorgar la máxima estabilidá al colectivu interín y tamién a los mesmos centros, para la so organización.
El cronograma inclúi convocatories selmanales tolos martes hasta xunu, incluyíu la ponte non lectiva que coincide con Antroxu. Tan solo nun se van sacar places a mediaos d’abril, na Selmana Santa. La postrera de tol cursu ta prevista pal llunes día 6 de xunu, una y bones el día 7 coincide col Martes de Campu, festivu n’Uviéu. Les axudicaciones caltiénense los xueves.
Educación anunciara yá en setiembre la so intención d’ameyorar la xestión de tolos procedimientos venceyaos al personal interiín, dende les oposiciones a les axudicaciones.
El director xeneral de Personal Docente, Miguel Sariego, esplicó qu’esta iniciativa avanza nesta llinia y adelantró que nun se trata d’una midida puntual, sinón que la so intención ye siguir ellaborando’l calendariu d’axudicaciones para tol cursu.
