Les pruebes de certificación nes escueles oficiales d’idiomes aplácense a setiembre. La Conseyería d’Educación tomó esta decisión qu’esti añu afecta a cerca de 4.300 aspirantes. La midida va facese estensiva al primer exame para acreditar el nivel B2 de Llingua Asturiana, previstu pa esti mes y que, nesti casu, va treslladase al últimu trimestre, dáu l’eleváu volume d’aspirantes. Los plazos pa que les 500 persones interesaes rematen el procedimientu d’inscripción na prueba van volver a entamar nos vinientes díes.
El Boletín Oficial del Principáu d’Asturies (Bopa) publicó esti llunes los cambeos qu’afecten a les pruebes de certificación de competencia xeneral para los niveles: básicu (A2), entemedios (B1 y B2) y avanzáu (C1) d’Italianu, Inglés, Alemán y Francés, que se van desenvolver ente’l 7 y el 17 de setiembre, en función de los niveles, y nuna única convocatoria.
Los primeros exámenes van corresponder al alumnáu del nivel avanzáu (C1), que se van celebrar los díes 7 y 9 de setiembre. Depués celebraránse los de nivel entemediu B2, los díes 10 y 11 de setiembre; B1, 14 y 15 de setiembre, y nivel básicu (A2), 16 y 17 de setiembre. La calificación final va espresase nos términos d’aptu, non aptu y non presentáu. Nesti sentíu, va considerase aptu a quien llogre, siquier, un 6,5 nel promediu de calificaciones de les cinco partes de la prueba. En tolos centros van adoptase les midíes de seguridá encamentaes poles autoridaes sanitaries.
