La conseyera d’Educación, Carmen Suárez, presentó esti miércoles na Xunta Xeneral les cuentes del so departamentu. El presupuestu d’Educación pal añu qu’entra contempla una medría del 5,2% pal financiamientu de la etapa d’educación infantil de 0 a 3 años. A esta etapa van destinase 17,1 millones de creitu ampliable pa subvencionar los gastos de funcionamientu y de personal de los 69 centros d’esti tipu repartíos en 43 conceyos.
Esti incrementu va permitir que les families numberoses qu’opten a matricular a los sos fíos nesta rede pueda facelo de forma gratuita. Amás, en 2020 prevese l’apertura de cuatro nueves escueles nos conceyos de Balmonte, Degaña, Parres y Ponga, y van ampliase les de Cangues d’Onís, Xixón, Castropol y Valdés.
Les inversiones n’infraestructures educatives xuben a más de 13 millones. D’ellos, 2,1 van destinase a diverses actuaciones en centros d’Educación Infantil y Primaria y más de 10,8 a la etapa de Secundaria. Ente les primeres, destaquen l’arreglu de la cubierta y l’adaptación d’espacios de la escuela d’educación infantil Infanta Leonor, de Castrillón; les meyores d’accesibilidá y reformes interiores nel colexu Teodoro Cuesta; la reforma de la cubierta y reformes enerxétiques nel edificiu d’educación infantil del colexu Llaranes; l’arreglu de la cubierta del colexu Las Arenas de Cabrales; la meyora de la pista deportiva del colexu La Vallina de Lluanco, y la reforma de la cubierta del colexu Turiellos, en Llangréu. Tamién se van redactar los proyectos básicos de los nuevos centros de Roces, Llatores (Uviéu) y Virxe de les Marees (Avilés).
Colos fondos de Secundaria, van acometese les obres de los institutos d’Enseñanza Secundaria (IES) La Fresneda y La Florida, y prevese empecipiar les obres del IES La Corredoria II y del nuevu aulariu del IES Rei Pelayo, en Cangues d’Onís.
