- La prueba, de calter informativu, formativu y orientador, va realizase per primer vegada dende una plataforma dixital.
- L’alumnáu va executar dellos exercicios de Llingua Castellana y Lliteratura, Inglés y Matemátiques.
La Conseyería d’Educación va recuperar en mayu la evaluación de diagnósticu de les competencies específiques correspondiente al cursu 2023-2024 na que van participar 15.000 estudiantes de 4º de Primaria y 2º de Secundaria. Esta prueba, recoyida na Llei Orgánica d’Educación y reforzada na LOMLOE, quedara atayada pola pandemia.
La nueva evaluación introduz dellos cambeos significativos. Asina, va tener periodicidad añal y calter censal, lo qu’implica la participación de tol alumnáu de dambos cursos. Coles mesmes, la so organización va ser obligatoria tanto para los centros públicos como los privaos.
Tamién se modifiquen los destinatarios de la prueba. Enantes realizábase nel últimu cursu de cada etapa y agora óptase por esaminar nos cursos entemedios para poder diseñar, si fuera necesariu, un plan d’actuación con ese alumnáu.
Les evaluaciones van desenvolvese ente los díes 6 y 31 de mayu nos centros d’enseñanza y van consistir en distintos exercicios de Llingua Castellana y Lliteratura, Llingua Estranxera (Inglés) y Matemátiques.
Per otra parte, col propósitu de simplificar la organización y lliberar al profesoráu d’una carga extra de trabayu, los exercicios van realizase al traviés d’una plataforma en llínea y la corrección va ser automática, sacante nel casu de la espresión escrita. Esi formatu dixital yá se vien emplegando dende va dellos años nos estudios internacionales como PISA, PIRLS o TIMMS.
Amás de les pruebes cognitives asociaes a cada competencia, va pescanciase información ente la comunidá educativa, por aciu los cuestionarios de contestu, sobro aquellos factores que puedan influyir nes resultancies académiques del alumnáu.
El director xeneral d’Inclusión Educativa y Ordenación, David Artime, presentó güei a les direcciones de los centros de Primaria y Secundaria los detalles de la nueva evaluación. “Gracies a ella, va recoyese una información bien importante que nos dexará llograr una radiografía en tiempu real del sistema educativu asturianu”, aseguró.
Artime añedió que la evaluación “va tener un calter informativu, formativu y orientador pal conxuntu de la comunidá educativa”. “El so oxetivu ye que los centros docentes ellaboren propuestes d’actuación que dexen adoptar midíes de meyora de la calidá y la equidad y, a última hora, contribuyan a que l’alumnáu algame les competencies establecíes”, remató.
