La plantiya del BMC Liberbank Xixón pa la próxima temporada ya ta zarrada. El club de La Calzada anunció esti miércoles en rueda de prensa tres fichaxes y una renovación. El club incorpora a les xixoneses Laura Rivas y María González y la llateral llionesa Marta Méndez y tien zarrada la renovación d’Estefanía Ruíz. «Tener una oportunidá asina en casa ye un pasu bien importante na mio carrera», esplicó Rivas.
El club yá comunicara en semanes pasaes les renovaciones de Raquel Caño, Lorena Téllez, Marizza Faria, Leticia Cobo, Shula Gavilán, Raquel Álvarez, Aida Palicio y Débora Torreira; y los fichaxes de la goliadora maniega Nerea Nieto, la central gallega Cecilia Cacheda y l’estremu madrilana Natalia Montilla. D’esta manera, la plantiya del BMC Liberbank Xixón dase por zarrada con quince xugadores que van tener el retu d’encarar otra dura temporada. El llistón va tar bien alto, dempués de realizar 2 escepcionales temporaes, onde l’equipu colóse ente los cinco meyores de la esixente Lliga Guerreres Iberdrola.
«Espero tar al altor y nun defraudar. Voi poner toles mios ganes y poder apurrir tolo necesario al equipu»
Laura Rivas, de 19 años, empezó a xugar fai 11 años nel colexu Laviada. En categoría infantil fichó pol Balonmano Xixón, onde desenvolvió tola so carrera, llogrando ser campeona d’Asturies en dos ocasiones y medaya de bronce nel Campeonatu d’España en categoría infantil. La xixonesa participó cola selección asturiana en toles categoríes, llogrando’l Campeonatu d’España en categoría cadete. Amás, foi internacional cola selección española junior.
La tamién xixonesa María González, de 19 años, formóse nel Club Grupu Ástur Balonmano, onde militó ente les temporaes 2010/11 y 2016/17. Na última temporada xugó nel Club Balonmano Bolaños, dende onde vuelve a Xixón pa defender el colores del Liberbank como yá ficiera na temporada 2017/18. «Espero tar al altor y nun defraudar. Voi poner toles mios ganes y poder apurrir tolo necesario al equipu. Sigo nun procesu de formación y creo que voi poder aprender enforma». Incorpórase tamién la llionesa Marta Méndez. La llateral xugó les dos últimes temporaes nún de los equipos de la parte alta de la Lliga Guerreres, l’Atléticu Guardés. Empecipió la so carrera nel Cleba Lleón onde la so gran progresión llevar a ser internacional en categoríes inferiores.
