Xixón al día

Etiqueta: La Calzada

  • Activu otra vegada el protocolu de contaminación na zona oeste de Xixón

    Activu otra vegada el protocolu de contaminación na zona oeste de Xixón

    El Conceyu de Xixón activó güei el nivel 0 del Protocolu d’actuación n’episodios de contaminación del aire na zona oeste de Xixón énte los datos recoyíos poles estaciones de midida calidable del aire.

    Establezse la implementación d’una serie de midíes en materia de control calidable del aire mientres la so activación empobinaes a amenorgar les emisiones contaminantes y a protexer la salú pública.

    Nel nivel 0 preventivu contempla, ente otres midíes, el riego de carreteres y la vixilancia de la circulación de vehículos pesaos que tresporten graneles sólidos pulverulentos na zona d’activación del protocolu con cuenta de comprobar la so llimpieza y la disposición de sistemes d’entoldáu y caxes hermétiques. Amás, prohíbese les quemes de restos vexetales en suelos non urbanos y va avisar a les empreses allugaes na zona y qu’operen baxu xuna autorización ambiental integrada (AAI) o autorización como actividá potencialmente contaminadora de l’atmósfera (APCA) por qu’adopten midíes d’amenorgamientu d’emisiones (les que con calter xeneral establez el Protocolu y les qu’específicamente concrete la so autorización ambiental). Tamién se recueye la necesidá d’estremar los precuros nos procesos industriales susceptibles de xenerar emisiones difuses, incluyida la manipulación y almacenamientu de graneles, nel marcu de les sos autorizaciones ambientales.

  • Xixón anicia’l llicitamientu del nuevu espaciu verde de la cai Costa Rica

    Xixón anicia’l llicitamientu del nuevu espaciu verde de la cai Costa Rica

    L’Ayuntamientu de Xixón empecipió’l procesu de llicitación pa la construcción del nuevu espaciu verde de la cai Costa Rica nel qu’anguaño hai cuatro solares con trés viviendes unifamiliares n’estáu d’abandonu.

    El conceyal d’Obres Públiques y Proyectos de Ciudá, Llamera Ron, presentó esta tarde’l proyectu nel Salón de Recepciones del Conceyu. Contempla’l valtamientu de les construcciones que yá fueron adquiríes pol Conceyu para acometer esta actuación y va amontase l’arboláu utilizando’l métodu Estocolmo’. Esti sistema aumenta sustancialmente la permeabilidá del suelu, ameyorando la crecedera de los árboles y evitando que los raigaños llevanten el pavimentu.

    Tamién se va tresformar en plataforma única unu de los trés viales qu’arrodien el futuru espaciu verde col fin de pacificar el tráficu y ameyorar la seguridá y la calidá de vida de les vecines y vecinos.

    Tal que esplicó’l conceyal, trátase, por tanto, d’una de les ‘ecomazanes’ que’l Gobiernu local va desenvolver na ciudá dientro de la estratexa pa la renaturalización urbana y pa la renovación del moblame urbanu, que la so finalidá ye humanizar los espacios y faer barrios más atentos.

    Esta intervención, que’l so presupuesto se cifra en 295.679’58 euros, ta incluyida nel proyectu de ‘Zona de baxes emisiones de La Calzada’, presentáu a los fondos europeos Next Generation para la Recuperación, Tresformamientu y Resiliencia.

    La llicitación va salir a contratación pública nos próximos díes, de cuenta que les obres van poder empezar en setiembre o ochobre con un plazu d’execución de seis meses.

  • Podemos-Equo Xixón denuncia’l mal estáu del Eduardo García Torner

    Podemos-Equo Xixón denuncia’l mal estáu del Eduardo García Torner

    Podemos-Equo Xixón denuncia güei na comisión de Servicios y Derechos Sociales el mal estáu de la pista cubierta del colexu públicu Eduardo García Torner de La Calzada. “Comuníquennos qu’ente’l techu que cubre la pista y les paredes hai una rede  desaniciada, rota, permitiendo que les palombes entren y aniden dientro de la pista y déxenla enllena d’escrementos”, esplicó esta mañana la portavoz, Laura Tuero. EL grupu municipal pide que se solucionen los desperfectos: “La suciedá y tamién insalubridá, impide que les clases d’Educación Física puedan desarrollase con normalidá, talo como los recreos y otres actividaes deportives que n’ella se realicen”. Amás, Laura Tuero esplica que la puerta d’entrada s’alcuentra ferruñosa, un pelligru pal alumnáu.

    La coalición tamién solicita na comisión que se coloque señalización, o otres midíes, nel circuitu del Kilometrín pa indicar a los y las viandantes que yes una zona de entrenamiento pa la práctica de la carrera a pie, dempués de dellex quexes recibíes pol grupu municipal de persones usuaries de la pista d’atletismu. 

  • Xixón reabre’l Puntu Llimpiu de La Calzada

    Xixón reabre’l Puntu Llimpiu de La Calzada

    Xixón recupera adulces la normalidá. Emulsa va reabrir esti miércoles el Puntu Llimpiu de La Calzada, unu de los que permanez zarráu desque se decretara l’Estáu d’Alarma. Esti espaciu súmase al de Roces pa emprestar los sos servicios de separación pal reciclae agora qu’Asturies s’alcuentra na Fase 1 de la desescalada. Nos vinientes díes va reabrir tamién les sos puertes el Puntu Llimpiu de Somió. Hasta agora, el de Tremañes va permanecer peslláu ensin que se concretara la so fecha prevista d’apertura.

  • Piesllen un chigre de La Calzada que taba abiertu con dos clientes dientro

    Piesllen un chigre de La Calzada que taba abiertu con dos clientes dientro

    Fin de selmana intensu pa la Policía Local. Los axentes del cuerpu pesllaron esti sábadu dos establecimientos qu’incumplieron les midíes impuestes pol decretu d’estáu d’alarma. Unu d’ellos ye un chigre de la cai María Zambrano onde había dos veceros nel interior a les 19:30 hores de la tarde. L’otru ye un llocutoriu de la cai Soria. Na so parte trasera taben realizándose trabayos de peluquería. En dambos casos, les persones que taben nos locales tamién fueron sancionaes.

    Nun foi la única intervención. A les 17:35 hores de la tarde, los axentes detuvieron a un home como presuntu autor d’un delitu de mancadures nel ámbitu familiar. Asocedió nuna casa del Camín de les Quintes. T.R., de 47 años y vecín de Xixón, allegó a la casa de la so expareya pa visitar a dos fíos que tienen en común, negándose a abandonala. Empezó entós a faltar, acosar ya inclusive emburriar a la so expareya, fechos qu’asoceden davezu. La patrulla detúvolu en llegando a la zona.

    Darréu, a les 23.50 hores, tamién foi deteníu un xixonés, nesti casu, por desobediencia grave. La Policía Local allegó a la so vivienda allugada na cai Acebal y Rato pa collaborar colos servicios médicos qu’atendíen a una muyer que s’atopaba nel interior inconsciente y tirada nel suelu debíu, posiblemente, al estáu de embriaguez. El deteníu, J.C.T.M. de 56 años d’edá, empezó a faltar pela ventana a los axentes y nun cesó a la llegada de los mesmos al pisu, momentu nel qu’empezó a proferir amenaces. Amás, negar a identificase mientres s’encaraba y desafiaba los policías.

    El sábadu fueron denunciaes 110 persones, 79 homes y 31 muyeres. La mayor parte de les persones teníen edaes entendíes ente los 21 y los 60 años.

  • Detenida una muyer en L’Algodonera por abandonu de menores

    Detenida una muyer en L’Algodonera por abandonu de menores

    La Policía Local de Xixón detuvo esti miércoles a una muyer por un delitu d’abandonu de menores. L’acusada dexó sola a la so fía de 7 años na so vivienda de L’Algodonera y mientres hores. Un vecín que taba pasiando a la so mascota sollertó d’esti fechu a les 03:39 hores. La neña taba pidiendo auxiliu con mediu cuerpu fora d’una ventana de la cai Maestru Amado Morán.

    Los axentes movíos hasta’l llugar de los fechos atoparon a la menor, n’evidente estáu de nerviosismu. Esplicó-yos que la so madre salió pela tarde ensin dexar la cena fecha. La puerta taba cerrada, por tanto, una vegada realizaron les investigaciones oportunes y ensin conocer el paradoriu de la culpable, solicitaron la presencia de Bomberos de Xixón p’aportar al interior de la casa pola mesma ventana pola que la neña apruciera.

    La Policía Local contactó con una hermana de la menor, de 23 años d’edá, quien se fixo cargu d’ella, avisando darréu de que la so madre diba en camín a la casa onde foi, finalmente, detenida. La neña manifestó que yera frecuente que, M.M.D.C. de 50 años d’edá, la dexara sola. Amás, les condiciones nes que s’atopaba la vivienda yeren de insalubridad y abandonu total con un fuerte golor y basura pola totalidá de la casa.

  • Conceyu y Principáu van ellaborar un plan p’ameyorar la calidá del aire na zona oeste

    Conceyu y Principáu van ellaborar un plan p’ameyorar la calidá del aire na zona oeste

    Un plan d’acción a un plazu curtiu p’ameyorar la calidá del aire na zona oeste de Xixón. La Conseyería de Mediu Ambiente y el Conceyu trabayen na ellaboración d’un protocolu qu’incluya midíes nes industries averaes y el puertu, amás d’actuaciones en movilidá y d’información a la población. Asina lo anunció esti xueves la viceconseyera de Mediu Ambiente y Cambéu Climáticu, Nieves Roqueñí, nuna rueda de prensa xunto al conceyal de Mediu Ambiente, Aurelio Martín.

    Roqueñí señaló que dambes alministraciones son sabedores del problema existente na zona oeste de Xixón tocante a la calidá del aire. Por eso, sorrayó que «nel ánimu de proponer soluciones específiques, alcordemos trabayar a comuña nel diseñu d’esi plan». Roqueñí avanzó que nes selmanes vinientes van llevase a cabu contactos colos axentes «consideraos relevantes pa los oxetivos de meyora». Ente ellos tan l’Autoridá Portuaria; el Ministeriu de Tresportes, Movilidá y Axenda Urbana; ArcelorMittal, y asociaciones de vecinos.

    El documentu inicial va sometese a información pública nos meses vinientes. El plan qu’agora se va ellabora va indicar les midíes a adoptar p’amenorgar el riesgu de superación o la so duración. La calidá del aire del conceyu de Xixón evalúase con seis estaciones y nun tien en cuenta los datos de la estación móvil d’El Lauredal.

  • L’IES Mata Xove, distinguíu pola so promoción del francés

    L’IES Mata Xove, distinguíu pola so promoción del francés

    L’institutu Mata Xove ta acabante de ser reconocíu pola so promoción del francés. La conseyera d’Educación, Carmen Suárez, apurrió esti llunes el sellu LabelFrancÉducation. Ye un reconocientu que l’Axencia d’Enseñanza del Francés nel Estranxeru (AEFE) concede a los centros d’enseñanza que participen nel espardimientu de la llingua y la cultura franceses.

    Un total de 66 centros docentes llograron n’España’l sellu LabelFrancÉducation: 16 d’educación primaria y 50 de secundaria (ESO y Bachilleratu). N’Asturies el IES Mata Xove ye’l primer centru docente que llogra esa reconocencia pola implicación, el compromisu y la dedicación de los equipos docentes. Esti institutu empezó col programa billingüe de francés nel añu académicu 2011-2012, pa convertise nun programa plurilingüe d’inglés y francés nel cursu 2016-2017. Anguaño ye ún de los siete centros plurilingües que pertenecen a la rede de 226 programes billingües d’Asturies. Amás, cuenta col sellu de centru eTwinning, una iniciativa europea dirixida a establecer hermanamientos ente centros escolares de distintos países cola cuenta de desenvolver proyectos de collaboración sobre cualquier tema del ámbitu escolar alcordáu polos participantes. Pa llevar a cabu los distintos proyectos utilícense ferramientes colaborativas disponibles n’internet.

  • EMULSA entama un plan especial de llimpieza nos barrios

    EMULSA entama un plan especial de llimpieza nos barrios

    Emulsa quier poner Xixón más guapu. La empresa municipal va desenvolver esti añu un plan especial de de llimpieza de fondura en cais, places y parques. Les actuaciones van llegar a 49 zones de tolos distritos urbanos de la ciudá. Los trabayos entamaron yá esta selmana nel barriu d’El Llano. Una ventena d’operarios van trabayar de llunes a sábadu, per selmanes, en cada una de les distintes zones. Van emplegar una docena de máquines. Con elles repasaránse en fondura los llabores habituales de llimpieza de ceres, baldeos y llaváu de contenedores. Amás, llevarase a cabu la descartelización y desratización, siega, pintura de moblame, revisión de xuegos infantiles y esbroce.

    Les actuaciones van llegar a puntos de tolos barrios, incluyendo Cimavilla, L’Arena, Viesques, Centru, Laviada, Pumarín, El Polígono, Roces, Nuevo Roces, Contrueces, El Coto, La Camocha, El Lauredal, La Calzada, El Natahoyo, Moreda, Tremañes, Xove, Portuarios, Pescadores, Montiana y Somió. L’oxetivu principal del plan ye realizar una repasada en fondura a les necesidaes de llimpieza de los barrios que sirva como ferramienta pa consiguir el compromisu cívicu de los ciudadanos col medioambiente urbanu de Xixón. La empresa municipal quier que los vecinos s’impliquen col caltenimientu de les zones verdes, la medría del reciclaje y l’usu de los Puntos Llimpios.

  • Xixón reclama la intervención del Principáu énte los datos de contaminación d’El Lauredal

    Xixón reclama la intervención del Principáu énte los datos de contaminación d’El Lauredal

    El Conceyu de Xixón súmase a la petición de la Federación d’Asociaciones de vecinos de Xixón y reclama al Principáu l’activación del protocolu anticontaminación. Los datos de la estación de midida de la calidá del aire d’El Lauredal superaron mientres ocho díes consecutivos la llende de partícules PM10. Por esti motivu, Emulsa entamó’l llunes a realizar baldeos d’agua nel barriu. El Consistoriu xixonés treslladó entós al Gobiernu asturianu la esmolición polos datos que se taben rexistrando. L’alministración autonómica ye la encargada d’activar el Protocolu por episodios de contaminación. Sicasí, la estación móvil d’El Lauredal pertenez al Conceyu y los datos rexistraos nun formen parte de la rede oficial.

    El Conceyu recuerda que’l Plenu municipal aprobó incorporar a la rede oficial una estación na zona oeste. L’alcuerdu foi aceptáu pol Principáu en siendo informáu. L’equipu de gobiernu xixones encamienta al executivu asturianu a tener en cuenta los valores rexistraos pola estación móvil d’El Lauredal. Esta estación vien superando los niveles de PM10 acaldía dende’l 24 d’avientu, sacante ayeri miércoles.

    La decisión del Conceyu foi decidió llindar la práctica deportiva nel esterior y evitar estancies enllargaes nel esterior de les zones afectaes. Según les previsiones meteorolóxiques, la ventilación atmosférica pa los próximos díes va ser favorable, lo que va favorecer la dispersión de les partícules contaminantes y la meyora de la calidá del aire.