El Centru Européu d’Empreses ya Innovación (CEEI) llanza la cuarta edición del so programa Se busca CEO, una propuesta singular que quier el’afitamientu n’Asturies de compañíes emerxentes (startups) por aciu la incorporación d’un director executivu. La iniciativa foi presentada esta mañana pol conseyeru de Ciencia, Innovación y Universidá, Borja Sánchez, y la directora del CEEI, Cristina Fanjul.
El programa, pioneru na comunidá, enceta’l fortalecimientu de startups altamente innovadores col fin de crear equipos completos y multidisciplinares, que aúnen perfiles de xestión o comerciales con tecnolóxicos, y tean alliniaos colos proyectos estratéxicos de crecimiento de la empresa.
La xornada de llanzamientu d’esta nueva edición celebróse en formatu mistu, presencialmente dende’l salón d’actos del edificiu CEEI nel Parque Tecnolóxicu d’Asturies, y retresmitida telemáticamente al traviés de la so canal de YouTube.
El conseyeru de Ciencia destacó la importancia de constituyir equipos multidisciplinares y con persones cualificaes que tengan capacidá de llideralgu y tean al tanto de les meyores tecnolóxiques y de les demandes del mercáu.
Otramiente, la directora del CEEI recordó que nos trés años d’andadura del programa participaron 91 persones, 47 empreses y 44 candidatos a CEO. Amás, llogróse fortalecer los equipos de 23 compañíes.
Pela so parte, el consultor Miguel Morán ufiertó la conferencia Construcción y puesta en marcha d’equipos motores, sobro la importancia de la meyora del rendimientu por aciu la xestión eficiente del talentu de les persones. Amás, la empresa Sunthalpy, una startup participante na anterior edición del proyectu, presentó la so esperiencia.
El programa Se busca CEO diríxese, per un sitiu, a empreses de recién creación y entamadores con proyectos altamente innovadores, que busquen crecer y completar los sos equipos incorporando la figura d’un CEO, mesmo qu’a empreses más consolidaes, que sopesen la puesta en marcha de proyectos d’intraemprendimientu basaos na innovación y la tecnoloxía y quieren reclutar talentu.
Per otru llau, tamién son candidates a participar persones con preocupaciones entamadores, interesaes n’integrase n’equipos promotores y apurrir les sos competencies al desenvolvimientu d’una startup, que demuestren alta capacidá de desenvolvimientu, proactividá y disposición a ufiertar el máximu grau de compromisu.
La duración del programa ye de 23 selmanes y estrémase en trés fases progresives. La empresa RHO Group, esperta en potenciar el crecimientu de les compañíes al traviés de la meyora del rendimientu, va encargase d’impartir la formación.
El programa tien places llimitaes y el plazu pa la presentación de solicitúes va tar abiertu hasta’l vienres 29 d’ochobre.
El CEEI creó una web na que puede consultase tola información :www.ceei.es/sebuscaceo
