El conseyeru de Fomentu, Cooperación Local y Prevención de Quemes, Alejandro Calvo, caltuvo güei un alcuentru col secretariu d’Estáu de Tresportes, Movilidá y Axenda Urbana, David Lucas, nel que s’encetó la próxima puesta en serviciu de la variante de Payares, xuntu con tolos demás asuntos qu’afecten a la comunidá. Tres l’alcuentru, Calvo amosó’l so prestu pola meyora de los compromisos adquiríos pol Gobiernu d’España col d’Asturies, recoyíos na Alianza pa les infraestructures del Estáu qu’Asturies precisa.
Tocantes a la puesta en marcha de l’alta velocidá ferroviaria, “un finxu históricu p’Asturies», según precisó Calvo, el ministeriu treslladó que tres la finalización de les últimes pruebes desenvueltes esta selmana puede constatase que la variante va abrir en payares, tal que taba previstu. Nel momentu que l’Axencia Estatal de Seguridá Ferroviaria autorizar, el Gobiernu d’España va anunciar el día concretu de la puesta en serviciu y va ser entós cuando s’empecipie la vienta de billetes.
La puesta en serviciu comercial de los nuevos trenes d’alta velocidá y gran capacidá, que van dexar encurtiar entá más los tiempos de viaxe, ta prevista pal primer trimestre de 2024. Na xunta, tamién s’analizaron, ente otros asuntos, les meyores nel plan de cercaníes, que preve un inversión de 1.491 millones n’Asturies.
Nel alcuentru participaron, amás de Calvo, el viceconseyeru d’Infraestructures y Movilidá y la directora xeneral de Tresportes. Per parte del ministeriu asistieron el comisionáu del desenvolvimientu del Corredor Atlánticu, José Antonio Sebastián, y la secretaria xeneral de Tresportes y Movilidá, María José Arrallo.
