El Conseyu de participación infantil y adolescente emitió’l so primer informe, nel qu’aboga por una sociedá igualitaria y ensin prexuicios. Esti foru ye una iniciativa pionera impulsada pola Conseyería de Derechos Sociales y Bienestar pa dar voz a los 345 menores que viven en dalgún de los 17 centros d’acoyida residencial d’Asturies y analizar les sos demandes.
El conseyu convocóse en marzu y dempués de nueve meses de trabayu los menores ellaboraron un informe nel que proponen una sociedá más igualitaria. Nél destaquen el llabor de los educadores que trabayen con ellos: “tienen claro como tresmitir valores y namás asina puede llegase a tresmitir la verdá”.
Esti foru volverá axuntase a principios de 2021, nun alcuentru nel que van participar la conseyera, Melania Álvarez, y el director del Institutu Asturianu pa l’Atención Integral a la Infancia, Carlos Becedóniz. El conseyu cunta con representación de dos menores per caún de los centros.
Álvarez señaló la relevancia d’atendelos: “Ye importante escuchar a estos menores y tomar decisiones siempre dirixíes a ameyorar el so desenvolvimientu y la so incorporación a la vida adulta. Nós tamién aprendemos enforma de les sos valoraciones y les tenemos en cuenta, porque somos conscientes de que la participación ye indispensable nuna sociedá llibre”.
