La conseyera de Cultura, Política Llingüística y Deporte, Vanessa Gutiérrez, presidió güei la xunta del plenu del Conseyu del Patrimoniu Cultural d’Asturies, onde s’informó favorablemente la restauración y rehabilitación del Palaciu de Mon, nel conceyu de Samartín d’Ozcos, con destín a equipamientu d’usos culturales y turísticos. La intervención propuesta consideróse respetuosa colos valores arquitectónicos, históricos y constructivos d’esti inmueble, declaráu Bien d’Interés Cultural (BIC) cola categoría de Monumentu por Decretu 88/2006.
El proyectu, promovíu pola Conseyería de Presidencia, Retu Demográficu, Igualdá y Turismu, prevé una actuación integral sobre esti conxuntu señorial tan notable, cola mira de garantizar el so caltenimientu y adaptar los sos espacios a funciones culturales nueves abiertes a la ciudadanía.
Ente los criterios valoraos positivamente pol plenu del Conseyu del Patrimoniu Cultural d’Asturies figuren la recuperación de les cubiertes tradicionales en llosa puesto sobre entabláu de castañal, la restauración de carpinteríes de madera, l’usu de masa de cal compatible colo orixinal, y la preservación d’elementos singulares como’l bistechu trapezoidal de la torre sureste o los pavimentos históricos de piedra nel interior.
El dictame incorpora tamién una serie de prescripciones técniques de detalle, empobinaes a asegurar el caltenimientu afayadizu del inmueble. Ente elles inclúyese l’usu de tratamientos non agresivos na llimpieza de vexetación y fábriques, y la documentación arqueolóxica detallada mentes se fai la obra.
El Palacio de Mon ye ún de los exemplos más relevantes d’arquitectura señorial del occidente asturianu. Presenta una configuración complexa, con cruxíes articulaes alredor d’un patiu central, torrexones esquineros, capiya, estancies nobles y zones de serviciu. La intervención agora autorizada representa un pasu decisivu pa la so recuperación y puesta en valor como espaciu de referencia pa la vida cultural del conceyu y del conxuntu de la contornada.
