Menos alumnos per aula y más profesores n’Infantil y Primaria. La Conseyería d’Educación presentó esti llunes el plan del Executivu pal nuevu cursu ente la crisis del coronavirus. El departamentu de Carmen Suárez plantega amenorgar la ratio de 25 alumnos per aula a un máximu de 20 nel ciclu d’Infantil y hasta cuartu cursu de Primaria inclusive. D’esta miente, per debaxo de los once años van poder configurase grupos flexibles y estables que convivan nos colexos amenorgando al mínimu les interacciones col profesoráu y los estudiantes d’otros niveles.
Esta planificación va poder precisar la contratación adicional d’unos 400 maestros. Esti refuerzu va financiase con cargu a los 30 millones colos que se va preparar el sistema educativu ente la crisis de la Covid-19. Pal restu de niveles la propuesta caltien los ratios. L’amenorgamientu de los ratios va afectar a dellos centros de Xixón y Uviéu pa los que yá esisten espacios alternativos.
Trés posibles escenarios
Educación va unviar a los axentes sociales el plan de trabayu pa recibir les sos propuestes. Una vegada concluyíes les conversaciones, va dictase un resolvimientu con instrucciones pa les distintes enseñances en cada unu de los trés posibles escenarios que podríen dase a partir de setiembre: docencia preferiblemente presencial, dafechu telemática o un modelu mistu. Amás, el Gobiernu asturianu va cuntar en curtiu con un plan de continxencia que va empobinar el llabor de los centros el próximu cursu y que estos tendrán d’afaer a la so situación particular.
El borrador coles midíes de prevención ya hixene sanitaria que tendrán d’aplicase’l próximu cursu nes escueles del ciclu d’Educación Infantil de 0 a 3 años va treslladase esti martes a la comisión d’Educación de la Federación Asturiana de Conceyos (FACC).
