¿Cuándo y ónde ver el globu de Xixón?

0
737

El globu aerostáticu col logo de Xixón va sobrevolar el cielu de la ciudá esta selmana. L’oxetivu ye que’l confinamientu deriváu del estáu d’alarma sía más llevaderu, amás d’entretener a los vecinos ensin necesidá de casa. Si les condiciones meteorolóxiques los permiten, el globu va realizar dos vuelos al día mientres toa esta selmana. La duración de cada vuelu será d’ente 30 y 45 minutos. Ún va ser n’horariu de mañana y otru n’horariu de tarde, despegando ente les 11:30 y les 12:30 hores y ente les 18:30 y les 19:30 hores nel horariu de tarde.

La primer salida va tener llugar esti llunes 20 dende Cimadevilla. Espérase que sobrevuele’l Puertu Deportivu, El Solarón, la zona de l’Avenida de Portugal, Pumarín y La Peral. El restu de los percorríos van depender del vientu del día anque la so trayectoria va ser siempres de norte a sur con variaciones a este o oeste. Los puntos previstos pa les distintes partíes son l’Avenida d’El Llano (frente al centru comercial Los Frenos), el Náuticu, el Puertu Deportivu, El Solarón, La Calzada, El Coto, El Rinconín y El Bibio. D’esta miente, búscase llegar a tol conceyu. Estos datos facilitaos son una estimación a la espera de la previsión diaria del tiempu atmostérico. El siguimientu de los vuelos puede realizase online.

Esta iniciativa, impulsada pol Conceyu y la empresa Volar en Asturias, forma parte de la campaña de promoción ‘Xixón espérate’. Dientro de la web www.volarenasturias.com xubiránse semeyes de la ciudá dende los altores sacaes esta selmana. Amás, van realizase retresmisiones en directu dende’l Facebook de la mesma empresa.

El globu aerostáticu ye un modelu de competición con capacidá pa pilotu y acompañante. Alleguen, davezu, a les pruebes entamaes inclusive fora de la nuesa rexón. Cola barquilla incluyida, esta aeronave que pasia’l nome de la villa polos altores mide 25 metros y el so vela pesa 104 kilogramos.