El Gobiernu d’Asturies apeló al consensu al rodiu de la Llei d’Impulsu Demográficu, la primer iniciativa lexislativa que va aprobar l’Executivu autonómicu. L’Executivu recibió con sorpresa y decepción les declaraciones del Partíu Popular (PP), tres la xunta caltenida esta mañana na Conseyería de Presidencia, Retu Demográficu, Igualdá y Turismu, enmarcada nuna ronda de contactos pa peracabar la so redacción.
El Conseyu de Gobiernu previera aprobar el proyectu de llei na primer xunta de la llexislatura. Nun lo fixo a pidimientu del yá ex voceru del PP, Diego Canga, quien propunxo aplazala pa facilitar l’alcuerdu. El PP dio unilateralmente por rotes les negociaciones.
“El compromisu d’esti gobiernu ye algamar el mayor consensu posible y vamos siguir trabayando pa consiguilo”, afirmaron fontes de la conseyería. “Nel procesu de diálogu d’esta llei demostremos que la voluntá d’alcuerdu ye real, modificando y asumiendo propuestes d’otres fuerces polítiques”, amestaron.
Na xunta d’esta mañana asumióse una de les demandes de los populares, compartida por otros grupos y rellacionada cola aplicación del Plan Retorna, concebíu pa favorecer el regresu de persones emigraes. “Llámanos l’atención que’l PP niegue darréu un acercamientu cuando se-yos treslladó una propuesta concreta que recueye les sos aportaciones”, llamentó la conseyería.
El pasáu vienres, con esa mesma voluntá, la directora xeneral d’Emigración y Polítiques de Torna, Olaya Gómez Romano, aconceyó en Santiago de Compostela col secretariu xeneral de la Emigración de la Xunta de Galicia, Antonio Rodríguez Miranda, nun alcuentru que sirvió pa conocer de primer mano la esperiencia gallega para avanzar na ellaboración del plan asturianu.
El Gobiernu d’Asturies comprometióse a impulsar en 2024 el Plan Retorna, pa que la so ellaboración cuntara coles aportaciones de les comunidaes asturianes nel esterior, d’organizaciones y d’espertos na materia.
“Resulten sorprendentes el fondu y les formes de delles manifestaciones que vimos güei. Por casu, la fiscalidá estremada que reclama’l PP pal mediu rural yá ye una realidá n’Asturies (ta recoyida nel proyectu) y l’oxetivu ye siguir avanzando nella con cada presupuestu”, añedió la conseyería.
El xiru na actitú de los conservadores respectu al planteamientu inicial de Diego Canga ablucó al gobiernu. “Nel PP paecen más interesaos n’escenificar una rotura qu’en dialogar y algamar alcuerdos. Sicasí, l’Executivu sigue cola mano tendida magar que paez evidente que güei asistimos a un cambéu na actitú del primer partíu de la oposición. Si va unos díes la prioridá yera apurrir y alcordar, agora paez que ye enterriar y encrespar irresponsablemente, buscando escuses coles que xustificar un desalcuerdu. Sería una llástima que los intereses partidistes torgaren un bon alcuerdu p’Asturies. Esperamos que recapaciten y vuelvan al diálogu”, concluyó la conseyería.
L’impulsu demográficu ye una prioridá indiscutible pal nuevu mandatu, tal que sorrayó’l presidente Adrián Barbón nel so discursu de investidura, nel qu’esplicó que l’ésitu nesti ámbitu, qu’esixe una acción tresversal, va depender del bon desempeñu de toles polítiques del Executivu. L’oxetivu que s’escuerre ye responder al descensu d’habitantes, l’avieyamientu y el despoblamientu con iniciatives eficaces a mediu y llargu plazu.
El gobiernu yá aprobara un proyectu de llei rellacionáu col retu demográficu a la fin del anterior mandatu. El testu, que nun llegó a tramitase na Xunta Xeneral, taba basáu nel dictame consensuáu na Cámara por tolos grupos parlamentarios, sacante VOX.
