Un asistente virtual en casa pa mayores con discapacidá

L’Executivu presenta’l proyectu de domotización intelixente, que s’establecería de mano en trés cases, énte’l Ministeriu de Ciencia y Innovación

0
560

El Gobiernu asturianu ellaboró un proyectu pa la domotización intelixente de viviendes y el fomentu de la vida autónoma de los usuarios con dependencia. L’Executivu presentó la propuesta énte’l Ministeriu de Ciencia, Innovación y Universidaes, que financia iniciatives d’esta clas con cargu al programa Retos, dotáu con un presupuestu que ta alredor de los 700.000 euros.

Esti proyectu, ellaboráu cola collaboración de Viviendes del Principáu d’Asturies (Vipasa) y el Centru Tecnolóxicu de la Información y la Comunicación (CTIC), propón la creación d’un asistente virtual nes cases que seya capaz a garantizar l’autonomía de les persones mayores que tienen dalgún tipu de llimitación.

La midida busca allargar la estancia de les persones con discapacidá de manera independiente nes sos propies cases. Pa eso precisen cuntar con una asistencia de calidá que-yos dexe desenvolver una vida normalizada ensin falta de tener que recurrir a una plaza residencial.

El proyectu cunta instalar en trés cases sistemes domóticos d’última xeneración y un asistente personal virtual. L’oxetivu ye qu’estos trés primeros equipamientos puedan instalase, nuna segunda fase, naquelles viviendes onde vivan persones mayores dependientes, que podríen beneficiase d’estes meyores tecnolóxiques d’última xeneración pa siguir viviendo nes sos cases con una asistencia adaptada a les sos necesidaes.

El ministeriu va subvencionar el 40 % del costu del proyectu que resulte escoyíu de tolos recibíos.