La Conseyería de Derechos Sociales ellabora una resolución pa impulsar el papel de la mocedá y reforzar la tresparencia.

La Conseyería de Derechos Sociales y Bienestar, al traviés del Institutu Asturianu pa l’Atención Integral a la Infancia y a les Families, prepara una llinia nueva de participación a nivel municipal y autonómicu pa fomentar la intervención de los menores nes polítiques d’infancia. Asina lo anunció esta mañana la conseyera Melania Álvarez, que presidió la xunta telemática del Foru Municipal polos Derechos de la Infancia.

Nel alcuentru tamién se presentaron otres propuestes d’actuación, como la renovación de la web del Observatoriu d’Infancia, que va cuntar con un apartáu específicu de participación pa facer esti recursu más accesible y llamativu. “L’oxetivu ye integrar la participación infantil nuna resolución que marque la llinia d’acción en toles polítiques de la conseyería nes que resulte oportuno cuntar cola opinión de menores y mocedá, amás de crear un grupu de trabayu del foru municipal alredor de la tresparencia”, esplicó Álvarez.

El Foru Municipal polos Derechos de la Infancia, que promueve la participación de los menores nes polítiques desenvueltes pol Executivu autonómicu, concrétase al traviés de dos órganos: el Conseyu Municipal d’Infancia y el Grupu Municipal de Participación Infantil.

Amás, el Día Internacional de los Derechos de la Infancia a nivel municipal va celebrase pela primer vez anguaño al traviés d’una candidatura abierta onde van poder participar los 46 conceyos que cunten con planes d’infancia.