El Gobiernu d’Asturies alza a 6 el númberu de comensales per mesa en terraces d’establecimientos hosteleros y amplía l’horariu d’atención nestes árees del esterior cola única llende del toque de queda, qu’a partir del sábadu va tar vixente dende les 23:00 hores. Amás, nel interior de chigres y restoranes caltien el máximu de cuatro persones por mesa y enllargase’l serviciu hasta les 21:00 hores.
L’atención en barra va siguir acutada, salvo pa la recoyida a casa, polo que’l consumu va tenese que realizar siempres en mesa, con una separación de 1,5 metros ente sielles de meses distintes.
El director xeneral de Salú Pública, Rafael Cofiñu; la directora xerente del Sespa, Concepción Saavedra, y el xefe d’Alertes y Emerxencies Sanitaries covid-19, Miguel Prieto, detallaron güei les nueves midíes qu’ayeri avanzó’l presidente, Adrián Barbón, y que se van aplicar a partir de les 00:00 hores del sábadu, día 10 d’abril.
Al marxe de la hostelería, Salú autoriza tamién l’apertura d’hoteles y agospiamientos turísticos con un aforu máximu del 50% en zones comunes, un porcentaxe que nel casu de los albergues vaya afitase nel 30%.
Tamién se van retomar les actividaes de guía turística y d’animación, siempres que se desenvuelvan, a lo más, en grupos de 15 persones n’interiores y de 25 n’esteriores. Los mesmos llendes van aplicase pa les visites a monumentos, cueves y xacimientos arqueolóxicos, según en biblioteques, museos, arquivos o sales d’esposiciones, ente otres.
Comerciu
L’aforu permitíu a partir del sábadu hasta’l 50% n’establecimientos minoristes d’esposición y vienta al públicu con una superficie cimera a 300 metros cuadraos. Esta llimitación va afectar tamién a les zones comunes de los centros comerciales, onde van poder abrir les árees recreatives, como ludotecas o árees de descansu.
Deporte
Salú autoriza l’entamu de les competiciones autonómiques nes categoríes absoluto y xuvenil, según la presencia de públicu nestes pruebes, hasta un máximu de 300 persones, sentaes en butaca preasignada y con distancia de seguridá.
L’actividá deportiva al campu podrá practicase en grupos d’hasta 25 persones, ente que n’instalaciones zarraes y en centros deportivos o ximnasios afítase un aforu del 50% y un tope de 15 participantes pa clases grupales.
Nes piscines d’usu deportivu l’aforu va aumentar a 4 persones per cai y podrán entamase clases d’hasta 15 persones.
Centros recreativos
Les actividaes en centros recreativos de mayores y mozos al campu van tar autorizaes en grupos d’hasta 25 persones, siempres que se garanticen les midíes de protección y la distancia de seguridá. N’interiores, va permitise con un aforu máximu del 30% de la capacidá total. Amás, va evitase’l cantar, el baille y el contactu físicu.
Mercaos de ganáu
Los mercaos de ganáu podrán celebrase cola presencia esclusiva de profesionales, tal como vien contempláu nel resolvimientu de la Conseyería de Desenvolvimientu Rural y Cohesión Territorial de 15 de febreru de 2021.
