La Conseyería de Mediu Rural y Cohesión Territorial analiza más de 15.000 respuestes llograes na encuesta técnica presentada nel procesu de participación ciudadana de la nueva Llei d’Ordenación Integral del Territoriu d’Asturies (LOITA). En total, contestáronse 241 formularios nos meses d’agostu y setiembre.
Les entrugues formuláronse a técnicos de les alministraciones local y autonómica, amás d’a colexos profesionales y otros colectivos de distinta índole, como asociaciones empresariales o ganaderes.
La directora xeneral d’Ordenación del Territoriu y Urbanismu, Sonia Ponte Landázuri, amosó güei el so prestu pola implicación nesta encuesta. “Non yá llogremos una elevada participación, sinón que les persones que participaron punxeron empeñu, respondiendo con casos prácticos y apurriendo información de valor que nos ta resultando de gran utilidá nel procesu de redacción de la llei”, señaló.
Una de les principales conclusiones de la consulta ye’l pidimientu xeneralizáu pa que’l Gobiernu d’Asturies tenga un papel más activu na ordenación del territoriu, col desenvolvimientu de planes intermunicipales. Asina, el 87% de les persones encuestaes considera aconseyable la tramitación de planes territoriales d’estes característiques, qu’organicen les estratexes al respective de les infraestructures, los asentamientos, el suelu rústicu o l’actividá económica, ente otros. Amás, el 61% cree que la llexislación actual inclúi conteníos claramente obsoletos.
El 77% de los espertos n’ordenación territorial y urbanismu tamién s’amuesen favorables a delimitar árees funcionales qu’arrexunten a dellos conceyos vecinos y de característiques similares, y que’l Principáu trate l’aprobación d’un preséu d’ordenación pa caúna d’elles. La ellaboración de guíes que faciliten la execución de los planes urbanísticos per parte del Executivu autonómicu espertó gran interés, con un 88% d’avales, y el 94% de les respuestes plantega que’l Principáu tien d’implicase más na xestión del suelu non urbanizable.
Simplificación alministrativa y reducción de tiempos
La simplificación alministrativa y la mengua del tiempu de tramitación son los cambeos que técnicos y profesionales asturianos consideren más necesarios, siguíos por una mayor sostenibilidá y una planificación más fonda de les actividaes económiques. Nesti sentíu, la mayoría de los encuestaos ta “bien d’alcuerdu” (con un promediu de 4,34 sobro 5) con que delles partes de los planes xenerales d’ordenación puedan modificase al traviés de procedimientos cenciellos. Amás, el 73% sofita que los conceyos pequeños y de menor complexidá territorial puedan aprobar un plan xeneral más simple.
L’apueste pola rehabilitación frente a la construcción nueva ye prácticamente unánime, con un 95% de los encuestaos a favor. Otros datos de valor llograos tienen que ver coles edificaciones tradicionales: el 57% de les respuestes sofita que les cortes o cabanes en suelu non urbanizable tengan dalgún usu, siempres qu’eso nun suponga una carga económica pa l’Alministración.
Los resultaos íntegros de la encuesta puen consultase na páxina web de la LOITA (https://cutt.ly/8Rfq3Kr). Amás, nos próximos díes, la Conseyería de Mediu Rural y Cohesión Territorial va llanzar una nueva encuesta nesti ámbitu dirixida a la ciudadanía.
