El Gobiernu del Principáu acaba d’autorizar una inversión de 3 millones destinada a la convocatoria d’ayudes pa la selección y puesta en funcionamientu de proyectos d’innovación de los grupos operativos de l’Asociación Europea d’Innovación (AEI). Esta llinia, incluyida nel Programa de Desenvolvimientu Rural que cofinancia’l Fondu Européu Agrícola de Desenvolvimientu Rural (Feader), diríxese principalmente a empreses agraries, agroalimentarias y forestales situaes nel mediu rural.
Los fondos faciliten a autónomos, pequenes empreses, sociedaes agraries de tresformamientu (SAT) y cooperatives, en collaboración colos centros tecnolóxicos, l’accesu a proyectos d’I+D+i colos qu’ameyorar la so competitividá y posibilidaes de desenvolvimientu. P’acceder a estos recursos, una o delles empreses d’un sector han de constituyir un grupu operativu al rodiu d’una iniciativa d’innovación que dea respuesta a una necesidá detectada.
Los grupos operativos van tar formaos por dellos miembros, ente los que pueden incluyise:
-Llabradores y ganaderos
-Organismos rellacionaos cola investigación
-Empreses agroalimentarias
-Empreses del mediu rural
-Empreses rellacionaes cola investigación y el desenvolvimientu
-Otros axentes rellacionaos col desenvolvimientu rural y el mediu ambiente.
