El Gobiernu d’Asturies va ameyorar los sistemes de grabación de 22 sales de vistes de xulgaos y va integrase col sistema informáticu de xestión procesal Minerva, que remanen los profesionales de xusticia. L’Executivu autonómicu autorizó un gastu de 803.290 euros, el creitu asignao al Principáu nel repartu de los 27 millones de fondos europeos destinaos a les comunidaes pa financiar la primer fase del Plan de Xusticia 2030, relativa a la implantación d’infraestructures dixitales homoxénees y interoperables en tol territoriu nacional.
Esta midida, que va facilitar les interacciones telemátiques, contempla la renovación de les infraestructures de les 22 sales de los órganos xudiciales pendientes, una y bones les d’Uviéu, Xixón y Avilés cunten con un sistema nuevu dende’l 2019.
L’actuación enmárcase nel Plan de Xusticia 2030 qu’impulsa’l Ministeriu de Xusticia en cogobernanza coles autonomíes pa diseñar cómo ha ser l’alministración xudicial na década que vien. Esti programa busca tresformar esti serviciu públicu pa facelu más accesible, eficiente y contribuyir al esfuerciu común de cohesión y sostenibilidá.
Asturies participa anguaño en trés iniciatives piloto rellacionaes cola tresformación dixital, la meyora organizativa y de los procesos, l’accesibilidá, la eficiencia, la seguranza y la sostenibilidá. Asina, tolos órganos xudiciales de la xurisdicción social y de la contencioso-alministrativa formen parte del programa Acceda Xusticia, pa facilitar la comunicación y acurtiar los tiempos qu’implica, por exemplu, el procesu de pidimientu de copies d’espedientes.
Otra manera, dos órganos xudiciales participen nel proyectu de perfeccionamiento del proyectu de testualización de grabaciones, pa la conversión a testu de la voz recoyida nuna grabación. Otra de les midíes d’implantación recién son les notificaciones automátiques a profesionales.
