L’Executivu tamién abre’l plazu de participación del decretu que va ameyorar la xestión del plan concertáu colos conceyos pa la prestación de servicios sociales.

El Gobiernu d’Asturies sacó a consulta pública previa’l proyectu de llei de la infancia y l’adolescencia con un plazu de 30 díes naturales, a partir de güei, pa que les persones interesaes presenten aportaciones a la norma futura. La Conseyería de Derechos Sociales y Bienestar quier recoyer la opinión de la ciudadanía, incluyida la de mocedá y menores, amás de la de les entidaes collaboradores afectaes.

Esta llei nueva va desenvolver los derechos de neños, neñes y adolescentes consagraos na Convención sobre los Derechos del Neñu. Los principios que van inspirar la norma son los de participación, equidá, protección contra cualquier forma de violencia, amás de la promoción, prevención, protección y sofitu a la familia, y la prioridá presupuestaria.

Otra manera, el departamentu qu’encabeza Melania Álvarez tamién abrió’l plazu de consulta pública previa, de 30 díes naturales, del decretu que va regular el financiamientu y distribución de fondos a les entidaes locales nel marcu del plan concertáu de servicios sociales.

Esti decretu va facilitar una meyor xestión del plan, que se va afacer a la realidá de los distintos conceyos en función de variables como la dispersión xeográfica, la orografía o’l númberu d’habitantes. Con esta norma, la conseyería va establecer un sistema de financiamientu anual, áxil y eficaz, que s’afaiga a les necesidaes de cada conceyu y que, amás, dote d’estabilidá’l sistema d’atención primaria de servicios sociales.

La ciudadanía pue facer les aportaciones que considere al traviés del portal http://www.asturiasparticipa.es/.