El Gobiernu d’Asturies convocó una llinia de subvenciones, dotada con 578.372 euros, pa rehabilitar y ameyorar inmuebles de titularidá pública o privada nos conceyos con menos de 5.000 habitantes.

Los apoyos, que pueden solicitase yá y hasta avientu de 2023, tamién van financiar actuaciones d’eficiencia enerxética que contribuyan a amenorgar les emisiones de dióxidu de carbonu. L’oxetivu ye amenorgar los consumos enerxéticos, garantizar ambientes afayadizos nos llares y afitar población nos conceyos con menos población.

Asturies cunta con 60 conceyos que formen parte d’esta categoría, según recueye la web del Institutu para la Diversificación y Aforru de la Enerxía www.idaes.es.
Pueden optar a les ayudes viviendes unifamiliares, edificios residenciales o de cualesquier otru usu, yá seya alministrativu, sanitariu, docente o cultural, ente otros.

Delles actuaciones subvencionables son la meyora de la envolvente térmica, l’usu d’enerxíes anovables nes instalaciones de calefacción, climatización, refrigeración, ventilación y agua caliente sanitaria, y los trabayos desenvueltos pa facer más eficientes los sistemes de llume.

Los sofitos van cubrir a lo menos el 50% de la obra, magar pueden llegar al 100% según los trabayos realizaos. Les actuaciones van ser escoyíes por rigorosu orde de presentación de les solicitúes correspondientes hasta l’escosamientu de los fondos.

Esta llinia de subvenciones ta incluyida dientro del Programa de rexeneración y retu demográficu del Plan de rehabilitación y rexeneración urbana del Plan de Recuperación, Tresformamientu y Resiliencia.

“Esti tipu d’actuaciones son fundamentales p’afitar población nos conceyos menos poblaos d’Asturies. Cualquier familia o entamador que quiera asitiase en dalgún de los 60 conceyos incluyíos o siguir viviendo nél tien que disponer d’una vivienda afayadiza y eficiente y esta ye una de les prioridaes pal Gobiernu d’Asturies”, aseguró’l director xeneral de Vivienda, Fermín Bravo.