El Gobiernu d’Asturies declaró güei dos díes de llutu oficial pol grave accidente llaboral que tuvo llugar esta mañana nuna mina de carbón de Zarréu (Degaña) nel que finaron cinco persones y otres cuatro resultaron mancaes de diversa considerancia de resultes d’una esplosión.
El presidente, Adrián Barbón, visitó’l puestu de mandu avanzáu instaláu na zona y treslladó les condolencias del gobiernu a toles families afectaes. Hasta Zarréu moviéronse tamién la conseyera de Transición Ecolóxica, Industria y Comerciu, Belarmina Díaz; el director xeneral d’Industria y Minería, Mauro Rodríguez, y el director xeneral de Cooperación Local y Seguridá, Llamera Ron.
«Vamos decretar dos díes de llutu oficial, pa mañana y pasáu, en señal de respetu. Sabemos yá que la mayoría de les víctimes viven en Llión, pero somos provincies hermanes y tenemos venceyos mui estrechos», esplicó Barbón, quien llamentó «la traxedia repitida tantes vegaes nes cuenques mineres» y pidió respetu énte’l dolor de les families de les víctimes.
El Centru Coordinación d’Emerxencies del 112-Asturies recibió l’avisu sobre una esplosión na mina pasaes les 09:30 hores y movilizó trés helicópteros, el grupu de rescate y la unidá canina, mesmo qu’a personal de los parques de bomberos de Cangas ya Ibias. Tamién montó na zona un puestu de mandu avanzáu pa coordinar les xeres. Pela so parte, el conseyeru de Movilidá, Cooperación Local y Xestión d’Emerxencies, Alejandro Calvo, activó a les 11:50 hores el Plan Territorial de Protección Civil (Platerpa), en fase d’emerxencia y situación cero, que dexa solicitar recursos a otres comunidaes en casu necesariu.
De los cuatro persones mancaes, dos reciben asistencia nel Hospital Universitariu Central d’Asturies (HUCA) y otros dos en centros hospitalarios d’El Bierzo y de Llión.
