El gobiernu d’Asturies ta acabante destinar 75.000 euros a una ayuda d’emerxencia pa la población palestina de la Franxa de Gaza que sufre’l ataque indiscrimináu d’Israel dende ochobre de 2023. La partida diríxese a un proyectu de sofitu psicosocial que busca amenorgar l’impactu de la violencia que sufre la población infantil y nuevo.
La sovención, autorizada esta selmana pol Conseyu de Gobiernu, va canalizase al traviés de l’Axencia de la ONU pa persones abellugaes de Palestina n’Oriente Próximu (UNRWA, poles sos sigles n’inglés) y enmárcase nel llamamientu d’emerxencia d’esta organización pa la educación n’emerxencies, la salú mental y el sofitu psicosocial a los neños y neñes. L’ayuda va utilizase pa pagar a doce terapeutes d’esti programa, que va beneficiar a 69.700 menores y rapacinos. Les actividaes previstes son les siguientes:
Psicoeducativas. Sesiones centraes en concenciar a les persones movíes internes sobre cómo encarar el duelu, el trauma y la perda. Tamién busquen l’adaptación a la nueva situación, l’autocuidáu, la resiliencia o la hixene. Amás, vab impartir educación sobe’l riesgu de los artefactos esplosivos.
Recreatives. Inclúin xuegos, acciones pa solliviar l’estrés, relaxación, reflexón y exercicios físicos. L’oxetivu ye apurrir a neños y neñes un escape temporal de la congoxa, el mieu y el trauma.
Consultes individuales y familiares. Una parte significativa d’estes consultes afronten efectos rellacionaos col trauma, como la depresión y la llerza. Nel marcu del proyectu, va crease un comité d’educación pa los espacios seguros de menores y nuevos nos abellugos y espacios comuñales, formáu por personal terapeuta, asistentes, personal docente, voluntariáu y proxenitores.
Esta sovención ye la segunda ayuda d’emerxencia del Gobiernu d’Asturies dende l’entamu de los ataques d’Israel a la población palestina. La primera concedióse en payares de 2023, por importe de 118.000 euros, pa cubrir les necesidaes alimentaries más acucioses de la población afectada polos bombardeos del exércitu israelí.
