El Gobiernu d’Asturies va recibir 187.000 euros del Executivu central pa esti fin, amás de pa iguar sitios y restaurar monumentos dañaos.
La Conseyería de Presidencia va realizar un estudiu preliminar de siete de les más de 400 foses franquistes alcontraes nel Principáu pa proceder a la so exhumación esti mesmu añu. Les foses escoyíes son Bimeda, Veiga de Rengos y La Vuelta’l Cáscaru, nel puertu de L.leitariegos, toes elles nel conceyu de Cangas del Narcea, amás de les allugaes nel altu d’El Palombo (Gozón), Gúa (Somiedu), El Molín de Xilu-Llandriu (Les Regueres) y El Fitu (Parres). Pa estos trabayos va cuntar con empreses especializaes y van realizase cates qu’aseguren resultaos de cara a la exhumación.
Les actuaciones van financiase con cargu a los 187.000 euros que’l Principáu va recibir del fondu del Estáu, dotáu con 11,3 millones, pa la recuperación de la memoria democrática. Esta cantidá va valir, amás, pa otros proyectos como la ellaboración d’una estratexa pa dar respuesta a les families asturianes que siguen buscando a les sos víctimes. Esto implica completar estudios históricos d’un grupu importante de foses, cola mira de tener preparáu un plan cuatrienal d’exhumaciones. Tamién se van iguar y señalizar sitios y van restaurase plaques y monumentos que sufrieron daños.
La conseyera de Presidencia, Rita Camblor, y la directora d’Emigración y Memoria Democrática, Begoña Serrano, trataron estes cuestiones na I Conferencia Sectorial de Memoria Democrática, convocada pol Ministeriu de la Presidencia, Rellaciones coles Cortes y Memoria Democrática.
Nel alcuentru telemáticu, Camblor recordó la dificultá que suponen los trabayos de localización, exhumación y identificación de víctimes represaliaes pol franquismu, yá que n’Asturies hai un mapa con 408 foses, de les que namás 38 foron desenterraes.
“Dexando aparte les foses comunes de los cementerios d’Uviéu, Xixón y Avilés, nes que podemos falar de miles de persones, tenemos otres repartíes per tola xeografía asturiana y les víctimes posibles soterraes en caúna d’elles van dende dos persones hasta grupos de 60. Esto ponnos nuna situación d’una dificultá especial”, esplicó la conseyera.
Parte importante de les yá alcontraes riquen un estudiu históricu más fondu primero de proyectar actuaciones. Por esta razón, según esplicó Camblor, el Principáu informó anguaño al ministeriu sobre 44 que tienen respaldu documental y testimonial abondu pa tener la seguranza de qu’ellí se realizaron fusilamientos y inhumaciones clandestines. La conseyera sorrayó, amás, la importancia de cuntar con un bancu d’ADN nacional que dexe avanzar na reconocencia de les víctimes.
El titular de Presidencia tamién valoró la convocatoria de la conferencia sobre memoria democrática: “Esti trabayu nun pue compartimentase, desque los asesinatos y les inhumaciones clandestines nun conocieron fronteres ente les comunidaes. D’esta forma, vamos avanzar na busca de les persones desapaecíes”.
