El Gobiernu d’Asturies illuminó ayeri d’azul dellos edificios institucionales, incluyíu’l de la Presidencia del Principáu, pa conmemorar el Día universal polos derechos de la infancia, que va celebrase’l sábadu, 20 de payares. La illuminación coincide cola celebración de la Xornada internacional de los derechos de la infancia, entamada pola Conseyería de Derechos Sociales y Bienestar cola collaboración del Institutu Asturianu d’Alministración Pública Adolfo Posada.
A esta iniciativa súmense los conceyos d’Avilés, Bimenes, Cabranes, Candamu, Cangas, Castropol, Colunga, Xixón, Llaviana, L.lena, Llanes, Miranda, Nava, Noreña, Uviéu, Ribeseya, Sariegu, Tinéu y Villaviciosa. Prevése que tolos edificios enciendan les sos lluces a les siete de la tarde.
La Xornada internacional de los derechos de la infancia empecipió cola intervención de la directora del Institutu Asturianu pa l’Atención Integral a la Infancia y a les Families, Marta del Arco. Tamién participaron el fiscal coordinador de menores, Jorge Fernández Caldevilla, y la lletrada del menor, Antonia Fuentes Moreno.
Mientres la xornada analizóse con detalle la Llei orgánica de protección integral a la infancia y l’adolescencia frente a la violencia. Marta del Arco fizo una valoración positiva: «Falamos d’una llei que marca plazos pa terminar cola violencia escontra la infancia en cualesquier de les sos formes y impón plazos concretos a les alministraciones pa que se coordinen, ellaboren estratexes y nel ámbitu d’esta planificación y coordinación desenvuélvanse acciones concretes empobinaes en favor del bienestar de los menores».
