El Gobiernu d’Asturies impulsa la puesta en marcha d’una Rede de Conceyos con Ciencia que va averar al territoriu actividaes rellacionaes cola investigación y l’innovación. L’oxetivu ye incentivar proyectos propios en cada conceyu y desenvolver acciones de divulgación itinerantes. El conseyeru de Ciencia, Innovación y Universidá, Borja Sánchez, informó sobre esta iniciativa en Gozón, unu de los primeros conceyos n’incorporase a la rede, onde visitó col alcalde, Jorge Suárez, el Centru d’Interpretación del Mediu Marín de Peñes.
Sánchez recordó qu’Asturies aspira a convertise nun polu de ciencia ya innovación con voz propia nel mapa nacional. “Pa ello, ye necesario cuntar con tolos conceyos interesaos nel fomentu de la ciencia y la tecnoloxía nel so territoriu”, esplicó. El titular de Ciencia destacó tamién que’l Principáu cunta con un ecosistema, tanto d’instituciones públiques como de centros privaos, “qu’en munches ocasiones resulta desconocíu y del que pueden beneficiase tolos conceyos”.
La rede va sirvir pa enriar actividaes itinerantes pela comunidá, especialmente na zona rural. Nesta ruta de la ciencia «van tener cabida acciones de divulgación al traviés de ciclos, conferencies, talleres, programes, esposiciones, cine, teatru y tou tipu d’iniciatives que tengan como fin averar la conocencia científica y l’anovación al territoriu y a la ciudadanía».
La Federación Asturiana de Conceyos (FACC) treslladó a tolos sos miembros la propuesta y son yá más d’una decena los conceyos interesaos n’incorporase. Amás de Gozón, van integrase Valdés, El Franco, Salas, Ibias, Tameza, Balmonte, Colunga, Cabrales, Llanera, Llaviana y Llangréu.
Al marxe de los grandes conceyos que cunten con programes de divulgación científica propios, el proyectu quier potenciar, sobremanera, la presencia d’entidaes llocales de menos de 20.000 habitantes. Pa ello, la Dirección Xeneral d’Innovación, Investigación y Tresformamientu Dixital va sofitar a los Centros de Dinamización Tecnolóxica Local (CDTL) como puntos de referencia pa coordinar y desenvolver propuestes d’espardimientu de la ciencia y la tecnoloxía.
Los conceyos que participen nesta rede van tener prioridá a la d’acoyer actuaciones que se pongan en marcha dende la Conseyería de Ciencia, Anovación y Universidá, amás de n’iniciatives específiques como la Selmana de la Ciencia.
