El Conseyu de Gobiernu aprobó esta tarde, nuna xunta estraordinaria, el nomamientu d’Eva Ledo Cabaleiro como nueva directora xeneral de Personal Docente de la Conseyería d’Educación.

 

Eva Ledo (Avilés, 1966) ye inxeniera industrial especializada n’Eletricidá. El pasáu 18 de marzu foi nomada presidenta del Conseyu d’Asturies de la Formación Profesional, responsabilidá qu’exerció hasta esti momentu. Na pasada llexislatura yá ocupó’l cargu de directora xeneral de Personal Docente y primeramente fuera xefa del Serviciu de Formación Profesional y Enseñances Profesionales.

 

Dende 1995 ye funcionaria de carrera del cuerpu de Profesores d’Enseñanza Secundaria nes especialidaes de Tecnoloxía y Sistemes Electrónicos y Automatismos y forma parte del cuerpu d’Inspectores d’Educación dende 2014. Tamién trabayó nos ámbitos de la siderurxa, la informática y l’inxeniería de proyectos.

 

La nueva directora xeneral releva nel cargu a Miguel Sariegu, que dimitió la selmana pasada n’asumiendo los erros asocedíos mientres el procedimientu selectivu al cuerpu de maestros, xestionáu por un comité dependiente del so departamentu.

 

El Gobiernu d’Asturies va nomar nos próximos díes a la persona que va asoceder a Eva Ledo na presidencia del Conseyu d’Asturies de la Formación Profesional.