La Conseyería de Presidencia, Retu Demográficu, Igualdá y Turismu pon en marcha un programa de formación gratuita pal sector turísticu al traviés de la plataforma dixital Aula Paraíso con 450 hores lectives. Esta iniciativa, que cunta con 170.000 euros de financiamientu de fondos europeos Next Generation, va dexar dar respuesta a los nuevos retos tecnolóxicos a los que s’enfrenten los profesionales d’esti ámbitu económicu, mesmo qu’ ampliar y actualizar les sos conocencies.
El Principáu consensuó col sector el catálogu de cursos disponibles, col fin d’ufiertar conteníos dinámicos y prácticos en distintes árees d’interés pa establecimientos, asociaciones y organizaciones turístiques.
Aula Paraíso (www.aulaparaiso.pro) ye una plataforma de teleformación na que s’agospien vídeos, webinarios, talleres prácticos y clases maxistrales. Al traviés d’esti sistema, el personal venceyáu al sector turísticu puede inscribise y realizar los distintos cursos con total flexibilidá horaria y dende cualquier puntu d’Asturies. D’esta miente, arréglase unu de los principales problemes a los que s’enfrenten los profesionales pa siguir cola so formación.
La plataforma d’aprendizaxe virtual cuenta con una amplia variedá de materies diseñaes para aumentar les habilidaes y competencies en distintes especialidaes. La duración de los 38 cursos ufiertaos varía ente les dos y les 20 hores y ente los materiales disponibles figuren ferramientes pa diseñar esperiencies turístiques, estratexes pa captar audiencia en redes sociales y guíes sobre los requisitos que dexen optar a un sellu de sostenibilidá.
Unu de los bloques temáticos del programa céntrase nes ferramientes de marketing dixital, imprescindibles a la de dinamizar los negocios turísticos, con cursos sobre fotografía creativa con dispositivos móviles, comerciu lletrónicu, posicionamientu web o tresformación dixital de chigres y restoranes. Amás, pa dar respuesta al aumentu de visitantes estranxeros que lleguen a Asturies, Aula Paraíso ufierta tamién cursos d’inglés empobinaos a la restauración y la hotelería.
