El Gobiernu d’Asturies peracaba la vienta de les parceles del polígonu de Bobes, según treslladaron güei’l conseyeru de Facienda y Fondos Europeos, Guillermo Peláez, y la conseyera de Transición Ecolóxica, Industria y Desenvolvimientu Económicu, Nieves Roqueñí, al alcalde de Siero, Ángel García, nuna xunta celebrada esta mañana.
Mientres l’alcuentru encetaron la situación xeneral de Sogepsa ysobremanera, el futuru de les parceles que, de resultes de la restructuración de la empresa, pasaron a titularidá del Principáu en Bobes. Les dos alministraciones coinciden en que’l procesu de saneamientu y el pasu a titularidá pública de la sociedá entamáu na pasada llexislatura foi satisfactoriu. Per parte del Principáu, Peláez y Roqueñí comunicaron al alcalde que la finalización del procedimientu alministrativu por que puedan vendese eses parceles va ser inminente.
Nestos últimos meses, la Conseyería de Facienda y Fondos Europeos remató una intensu llabor de depuración, regularización contable ya inscripción de les parceles de Sogepsa. D’esta miente, y dada la so naturaleza xurídica, les parceles yá taríen disponibles pa volver al mercáu.
Pa completar esta acción, nos próximos díes va alzar al Conseyu de Gobiernu un alcuerdu pa la adscripción de les parceles afectaes a la Conseyería de Transición Ecolóxica, Industria y Desenvolvimientu Económicu, departamentu competente en suelu industrial. Esta área va ser la que s’encargue de la comercialización de los terrenes. Coles mesmes, aquelles parceles de Bobes que Sogepsa yá tenía acutaes van ser vendíes directamente pola conseyería lo más llueu.
