El Gobiernu d’Asturies trabaya coordinadamente col Conceyu d’Uviéu para convertir en realidá’l proyectu de rexeneración urbana pal ámbitu d’El Cristu-Buenavista tal que reflexa’l protocolu suscritu ente dambes alministraciones nel añu 2016.
El Principáu va poner en marcha nesta primer fase d’actuación el desenvolvimientu de la ordenación urbanística que, acordies al proyectu de tresformación global, afecta a los sos terrenos n’El Cristu, una vegada que’l Ministeriu del Interior manifestó les sos duldes sobre’l programa de necesidaes facilitáu en 2014 y la propuesta d’allugamientu recoyíu nel proyectu. La Conseyería de Mediu Rural y Cohesión Territorial, que caltién el so firme compromisu cola ciudá, acuéllese a la fase del “mentanto” prevista n’el mesmu conveniu, lo que va permitir que’l procesu de tresformación pueda empezar cuanto antes.
El Principáu va poner asina a disposición de la ciudá d’Uviéu una serie de parceles destinaes a equipamientos de nueva construcción y va rehabilitar el singular edificiu denomináu Los Hongos, obra realizada en 1964 polos arquitectos Ignacio Álvarez Castelao y Francisco de Saro. La conseyería va tener la oportunidá de rehabilitar y devolver a Uviéu y a tolos asturianos esti edificiu, de gran interés arquitectónicu.
Primeramente, el Principáu yá avanzara, de manera conxunta col consistoriu en trés de les cinco fases establecíes nel protocolu. La primera consistió nel procesu de participación, onde les conclusiones formaron parte del concursu internacional d’idees. La propuesta ganadora, HUCAMP, resuelve l’insertamientu d’una nueva trama urbana de futuru pal centru de la ciudá. Esti concursu llevóse a cabu nel añu 2017. Los pliegos del concursu acompañáronse d’una serie de documentos apurríos por toles partes. La propuesta ganadora, desenvuelta nel Plan Especial, esti añu en tramitación, asina lo recueye. Unu d’ellos facía referencia a una parcela pa la construcción d’un nuevu cuartel pa la Policía Nacional, onde esta institución pretendía unificar toles sos dependencies de la ciudá, tal que lucrativu, pa poder resolver les mires de la Tesorería Xeneral de la Seguridá Social.
El proyectu algama la cuarta fase establecida nel conveniu
El proyectu atópase yá na cuarta fase de les cinco que recoyía’l conveniu del 2016, en rematando la tercera col encargu y redacción de los documentos urbanísticos per parte del Principáu. Esto significa que nesti momentu’l Conceyu d’Uviéu yá dispón d’esta documentación y que tendrá de tramitala.
Estos tresformamientos urbanísticos complexos son carreres de fondu a mediu y llargu plazu qu’impliquen el compromisu firme de toles alministraciones actuantes. Nesti casu implica a trés alministraciones distintes (local, rexonal y estatal, caúna colos sos intereses). El Principáu siempre quixo dotar a Uviéu d’una serie d’equipamientos públicos, locales y rexonales que permitan impulsar l’actividá económica, al tratase d’unos suelos con allugamientu estratéxicu, bien comunicáu, nel centru de la ciudá y del corazón d’Asturies.
