La conseyera de Presidencia, Rita Camblor; y el rector de la Universidá d’Uviéu, Ignacio Villaverde, roblaron dos convenios cola Universidá d’Uviéu pa la creación de dos tales cátedres, una que lleva’l nome de Concepción Arenal, dedicada a l’Axenda 2030, y l’otra, col de Rafael del Riego, destinada al Bon Gobiernu.
L’Executivu del Principáu va financiar caúna d’elles con 15.000 euros añales, ente que la institución académica comprometese a apurrir la documentación, los medios y les instalaciones necesaries pal so desenvolvimientu. Pela so parte, les profesores universitaries responsables de los conteníos van ser Eva Menéndez Sebastián y Rosario Alonso Ibáñez
La Cátedra Concepción Arenal va impulsar programes rellacionaos colos ámbitos d’actuación prioritarios de l’Axenda 2030 nos campos de la investigación, la divulgación y la formación. La que lleva’l nome del políticu y militar de Tuña que se llevantó contra’l gobiernu absolutista de Fernando VII va centrar n’acciones venceyaes al bon gobiernu, la tresparencia, la participación y la rindición de cuentes.
La conseyera consideró un motivu de celebración la firma d’estos convenios, yá s’afiguren la collaboración de dos entidaes “que son bien necesaries pal nuesu presente y pal nuesu futuru”. Na so opinión, la Cátedra Rafael del Riego de Bon Gobiernu va facer emanar dende Asturies una referencia académica insustituible con que’l so sofitu esperamos dir construyendo les pieces d’una meyor Alministración, moderna, próxima, eficiente, tresparente, participativa y dixital”.
La Cátedra Concepción Arenal de Agenda 2030, añedió, “ye un preséu útil que nos sirvirá de guía y sofitu mientres los próximos años pa percorrer el camín que nos señala esa fueya de ruta”.
L’Axenda 2030 pal Desenvolvimientu Sostenible ye un plan d’acción a favor de les persones, el planeta y la prosperidá, que busca fortalecer la paz universal y l’accesu a la xusticia. Compromete a 193 estaos de Naciones Xuníes y preséntase como la única vía posible para erradicar la probeza, caltener el planeta y ameyorar les vides y les perspectives de les persones en tol mundu.
Polo que se refier a la elección de los nomes, Concepción Arenal foi una activista comprometida cola meyora social, polo que resulta aparente pa denominar una cátedra que se centra na meyora de la sociedá, bien seya al traviés del mediu ambiente, de la crecedera económica o de la xusticia social. Natural de Galicia, moró mientres años n’Asturies y tuvo bien venceyada cola mesma.
Rafael del Riego, pela so parte, foi un de los grandes defensores de les llibertaes polítiques y foi executáu por querer devolver a España a la sienda constitucional qu’empecipiaren les Cortes de Cádiz en 1812 y qu’antemanaba un Estáu modernu con división de poderes, elecciones por aciu sufraxu y nel que la ciudadanía española diba ver protexíos los sos derechos fundamentales.
Camblor destacó finalmente que “investigación, divulgación y formación van ser les trés pates sobro les que van trabayar les dos cátedres a les que deseyo’l mayor de los ésitos y comprométo-yos la mayor implicación de la Conseyería de Presidencia”.
