El Gobiernu d’Asturies, al traviés de la Conseyería d’Industria, Empléu y Promoción Económica, y el Grupu Renfe van impulsar proyectos y desenvolvimientos tecnolóxicos y innovadores que favorezan el procesu de descarbonización nel tresporte ferroviariu y contribuyan, al empar, al impulsu del tresporte colectivu al traviés del ferrocarril.
El conseyeru d’Industria, Empléu y Promoción Económica, Enrique Fernández, y el presidente de Renfe, Isaías Táboas, soscribieron esta mañana un protocolu de collaboración pa trabayar de manera conxunta na incorporación progresiva de combustibles alternativos como’l biogás y l’hidróxenu nes sos unidaes y llinies del Principáu. Cola coordinación del Gobiernu d’Asturies y cola participación d’otres empreses, Renfe va realizar les primeres pruebes con un tren de viaxeros, utilizando biogás pa la tracción ferroviaria.
El protocolu va desenvolvese por fases, en función del financiamientu disponible. Na primera van desenvolvese, van probar y van validar los modelos de trenes que la empresa pretende utilizar con biogás y hidróxenu. Asina, prevése la tresformación d’una unidá eléctrica serie 3600 pa ser impulsada con hidróxenu. Na segunda fase plantega sustituyise, siempre que se cunte con ayudes europees, el parque ferroviariu rexonal por vehículos impulsaos por gases anovables.
Cuando’l proyectu cunte coles subvenciones necesaries, va incorporase la Fundación Barredo, que va aportar les sos instalaciones úniques y singulares pa realizar ensayos.
El conseyeru d’Industria destacó que l’alcuerdu con Renfe “ta dafechamente alliniáu cola Estratexa de Transición Enerxética d’Asturies, na que se contempla la promoción de los gases anovables como una de les llinies pa consiguir el cambéu nel futuru modelu enerxéticu”.
De resultes del protocolu, Renfe va incorporar con calter inmediatu al programa H2 ReCoDe, acrónimu de Reactivación, Competitividá y Descarbonización, una iniciativa na que participen 17 compañíes y instituciones de la comunidá y qu’axunta 20 proyectos venceyaos a la producción y l’usu d’hidróxenu verde n’Asturies.
Con esti proyectu, el Gobiernu d’Asturies quier conformar un clúster rexonal de producción y consumu d’hidróxenu. “La incorporación de Renfe va suponer un refuerzu y afitamientu de la iniciativa, al integrar un componente d’usu de H2 nel sector ferroviariu”, valoró Enrique Fernández.
Enagora, H2 ReCoDe plantégase los siguientes finxos: la instalación de más 20 electrolizadores con una potencia de más de 650 megavatios (MW), la producción anovable asociada de más 900 MW y la producción de más de 35.000 tonelaes al añu d’hidróxenu verde.
De cara a promover los desenvolvimientos conxuntos n’ámbitu de la descarbonización nel tresporte ferroviariu, la Conseyería d’Industria, y Renfe van entamar, como primer acción divulgativa, unes xornaes del hidróxenu y la movilidá ferroviaria. Esti alcuentru va dexar visibilizar el vehículu Fabiolo 3411, la primer unidá ferroviaria del mundu qu’incorpora hidróxenu, pila de combustible y bateríes como sistema de tracción, que Renfe va ceder al Muséu del Ferrocarril de Xixón.
