El Gobiernu d’Asturies considera que l’axudicación a la empresa Hulleres del Norte S.A. (Hunosa) d’un paquete de 50 megavatios que-y dexará encarar el procesu de tresformamientu de la central térmica de La Pereda (Mieres) nuna instalación de biomasa ye una gran noticia, porque afita’l porvenir de la compañía y va impulsar la reactivación de les cuenques mineres.
La Conseyería d’Industria, Empléu y Promoción Económica señala qu’esti proyectu ye especialmente relevante pa la comunidá, porque dexa dar continuidá a mediu y llargu plazu a la térmica de La Pereda por aciu la incorporación de tecnoloxíes que sustitúin la quema de carbón y estériles por recursos autóctonos como la biomasa forestal.
El tresformamientu de La Pereda resulta clave por dellos motivos:
· Contribúi a caltener la calidá del suministru eléctricu y supon un respaldu pal sistema.
· Dexa consolidar los 134 empleos directos ya indirectos venceyaos anguaño a la instalación y preve xenerar cerca de 180 más nel sector forestal.
· Contribúi a xenerar actividá económica nos conceyos mineros nuna comunidá en plenu procesu de transición enerxética.
· Amenorga sensiblemente la buelga de carbonu de les instalaciones actuales.
· Contribúi a la diversificación enerxética d’Hunosa y abre otres opciones de futuru, como la captura de CO2, almacenamientu o redes de calor.
· Impulsa’l tresformamientu d’Hunosa nuna empresa pública enerxética dientro del mix de xeneración asturianu y español.
· Cumple colos parámetros y prioridaes del Plan REPowerEU, impulsáu pola Comisión Europea pa dar respuesta al impactu de la guerra d’Ucrania nel mercáu, por aciu la producción d’enerxíes llimpies y la diversificación de los suministros enerxéticos.
El conseyeru d’Industria, Empléu y Promoción Económica, Enrique Fernández, sostien que la resultancia de la puya ye un elementu d’especial transcendencia pa configurar la futura Hunosa ya impulsar el so tresformamientu dende una empresa minera a una compañía de servicios enerxéticos y medioambientales, potenciando coles mesmes el so papel tractor nes contornes mineres. “Vamos siguir collaborando cola compañía pal desenvolvimientu de nueves actividaes y ámbitos de futuru, ente los que figuren la geotermia, la enerxía fotovoltaica, l’hidróxenu verde o la restauración d’espacios mineros, ente otros”, aseguró.
Pela so parte, la directora xeneral d’Enerxía, Minería y Reactivación Belarmina Díaz Aguado, indica que’l proyectu reconoz el protagonismu qu’hai de tener Hunosa como axente dinamizador na reactivación de les cuenques. “Ye una gran noticia p’Asturies. Esti gobiernu siempres sofitó’l tresformamientu de La Pereda nuna central de biomasa. Trátase d’una oportunidá de desenvolvimientu pa les contornes mineres porque va dexar avanzar nuna transición xusta por aciu la xeneración de nuevos empleos venceyaos a la xestión de los recursos forestales y la recolocación de trabayadores escedentes de la minería”, esplicó.
