La Conseyería de Mediu Rural y Cohesión Territorial sacó a llicitación les obres de la rede de caminos de la concentración parcelaria de los montes d’Anlleo, en Navia. El presupuestu xube a 991.000 euros y les empreses interesaes puen presentar ufiertes hasta’l día 27.
Los trabayos van dexar crear accesos afayadizos nes finques resultantes de la concentración y nos pueblos de la zona, de manera que dexen el pasu de maquinaria agrícola. Asina, van redimensionase los viales p’adaptalos a los usos nuevos y van redefinise los accesos a zones d’esplotación y los núcleos rurales. Los más de 26 quilómetros d’esta rede suponen tamién un espaciu afayadizu pa la práctica de senderismu y otros deportes.
Anlleo ye una zona de montes averada a Navia onde se van poner en valor 616 hectárees de monte, de les que’l 85 % ye superficie yá plantada d’ocalitu pa celulosa. El minifundiu y la falta d’accesos facíen inviable un sistema de producción rentable y sostenible. Sicasí, cola concentración parcelaria pasóse de 1.500 finques a poco más de 380, lo qu’ameyora la xestión y clarifica la propiedá.
Les concentraciones forestales apurren munches ventayes pa los propietarios, ameyoren caminos y rentabilicen en más del 60 % la esplotación de los montes. Al marxe del beneficiu que suponen pa la producción de celulosa, constituyen tamién grandes sumidorios de CO2 na contornada de delles de les industries más importantes de la zona occidental.
