El conseyeru de Facienda y Fondos Europeos, Guillermo Peláez, presentó güei a los conceyos una nueva propuesta que-yos dexará aforrar más de cuatro millones nos fondos que paguen a l’Alministración autonómica pola delegación de la xestión tributaria local. El gobiernu busca con esta midida fomentar la collaboración colos conceyos y reforzar el municipalismu, gracies a les ventayes que supón la xestión centralizada. Tamién s’intenta aliviar l’esfuerzu que tendrán que realizar les arques locales. “Falamos de rebaxes próximes al 30%”, precisó Peláez tres axuntase n’Uviéu con representantes municipales.
El Gobiernu d’Asturies va asumir el costu económicu d’esta rebaxa, que va tar disponible pa tolos conceyos qu’asina lo deseyen a partir de 2025 y va concretase nos nuevos convenios que suscriban cola Alministración autonómica. “Vamos facer l’esfuerzu presupuestariu correspondiente, porque consideramos que ye una bona midida”, esplicó’l conseyeru. Al so xuiciu, los conceyos tienen que beneficiase de la esperiencia del Ente Públicu de Servicios Tributarios y tamién del so dixitalización, que supunxo una meyora xeneral del serviciu.
En función del sistema actual, l’ente tributariu percibe de media’l 5% de la recaldación de cada conceyu pola delegación de la xestión. Peláez propunxo que, a partir del próximu añu, ente a valir un modelu de compensación de gastos que va amenorgar sustancialmente les cuantíes qu’abonaron hasta agora pola xestión en períodu voluntariu. “Entendemos que ye más xusto, porque calcula meyor el costu de la xestión que realiza l’ente”, esplicó.
El conseyeru añedió qu’esta nueva propuesta “refuerza l’autonomía financiera de los conceyos” y supon una modernización que toma como referencia los convenios que robla la mesma Axencia Estatal d’Alministración Tributaria.
Na xunta, que cuntó col sofitu de la Federación Asturiana de Conceyos (FACC), al traviés de la so presidenta, Cecilia Pérez, participó tamién la directora xeneral de Presupuestos y Finances, Mar García Salgado.
Ta previsto que dende l’Ente Públicu de Servicios Tributarios s’habilite una ventana rápida pa que los conceyos interesaos puedan tramitar los nuevos convenios pa qu’entre a valir el 1 de xineru de 2025.
