La Conseyería de Mediu Rural y Cohesión Territorial empecipió los trabayos a los que se comprometió nel senu de l’Alianza social y política poles infraestructures del estáu qu’Asturies precisa, col fin de reorganizar les llinies y frecuencies de la rede de cercaníes ferroviaries n’Asturies y optimizar la ufierta de servicios de tresporte públicu, tanto en ferrocarril como per carretera.
Esti foi’l motivu de la xunta de trabayu celebrada güei ente’l viceconseyeru d’Infraestructures, Movilidá y Territoriu, Jorge García, y el xerente de Renfe Viaxeros n’Asturies, Javier González Villoria, na que participaron tamién técnicos de la operadora, de la conseyería y del Consorciu de Tresportes d’Asturies (CTA). Una vegada constituyíu’l grupu, nes próximes selmanes va analizar les debilidaes y fortaleces de les ocho llinies de ferrocarril enantes de la pandemia y la so combinación con otres maneres. Pa ello, van basase n’estudios de xeollocalización, datos d’aforos y movilidá de la rede. Esti análisis de campu va dexar evaluar tamién les condiciones de toles estaciones y apeaderos.
En teniendo esa información, el grupu va abrir les sos xuntes a otros axentes implicaos como la Federación Asturiana de Conceyos (FACC), pa dar voz a los conceyos que puedan vese concerníos pola meyora de la ufierta ferroviaria; según asociaciones y colectivos interesaos. Finalmente, va emitir les propuestes de reorganización, de les que tamién se va dar treslláu a l’alianza poles infraestructures.
Los trabayos del grupu d’espertos en movilidá van centrase nel análisis y la redistribución de llinies y frecuencies, de los servicios directos y semidirectos, y del rediseñu de los transbordos, col fin d’optimizalos nel marcu d’una rede fiable. La política de tresbordos va tar dafechu operativa asina Renfe concluya’l procesu d’integración tarifaria que yá empecipió.
Nesti rediseñu pa integrar les trés llinies de Renfe y les cinco de l’antigua Feve va primase l’atención a aquellos trayectos que tengan mayor potencial de captar nuevos viaxeros, al consolidase como una alternativa curiosa frente al tresporte priváu
