El grupu colombianu Indaer, especializáu na prestación de servicios técnicos para’l sector aéreu, va coordinar dende Asturies toles sos actividaes pa Europa y los países d’Oriente Mediu. La compañía anunció güei qu’escoyó’l Principáu pa instalar la so base operativa en dambos mercaos, onde opera dende va dos décades, anque hasta agora nun cuntaba con see permanente.
La implantación de la see de la multinacional foi presentada pol conseyeru d’Industria, Empléu y Promoción Económica, Enrique Fernández, nun actu al qu’asistieron Juan Carlos Osorio, CEO de Indaer, y Daniel Restrepo, director d’operaciones de la empresa y responsable de la nueva see n’Asturies. Tamién participó Eva Pando, directora xeneral del Idepa.
Enrique Fernández manifestó’l so prestu pol anunciu del grupu Indaer, el sestu proyectu d’inversión que decide enllantase n’Asturies nel marcu de la Estratexa d’Atracción d’Inversiones. Al so xuiciu, la llegada de la compañía confirma que’l Principáu ta convirtiéndose nun polu d’atracción d’inversiones”. “Ta demostrando que ye un llugar aparente pal desenvolvimientu de nueves actividaes empresariales en tolos ámbitos y sectores d’actividá”, valoró.
Na so opinión, a la decisión de Indaer y d’otres compañíes tán contribuyendo “los recursos endóxenos y les ventayes competitives d’Asturies”, según el “escelente trabayu de los equipos técnicos del Idepa dedicaos a l’atracción de proyectos empresariales”. “Lo que ta asocediendo nun ye frutu de la casualidá; hai muncho llabor de prospección, analís y evaluación de potenciales inversores”, precisó.
La llegada de Indaer abre la puerta a un nuevu sector d’actividá na comunidá, con potencial de crecedera a mediu y llargu plazu. La inversión envalorada algama los 700.000 euros y prevese la creación d’ocho a diez empleos de personal d’alta cualificación nos primeros años. La plantiya va tener la so base operativa nel Parque Tecnolóxicu d’Asturies, en Llanera, y va sofitar al restu del equipu nel so centru corporativu nel continente americanu.
Indaer súmase a los cinco proyectos confirmaos dende’l llanzamientu de la Estratexa d’Atracción d’inversiones en xunu de 2020: Mind Facilities Management, Bedrock Inteligence, TEAM EQ, Preco y Sía Eight. Cola implantación de Indaer captáronse hasta agora inversiones per valor de 220,7 millones que suponen la creación de 209 puestos de trabayu.
