Nos últimos meses, el Muséu del Pueblu d’Asturies recibió la donación de numberoses colecciones de fotografíes familiares, y dalguna d’elles merez ser espublizada pola so calidá o singularidá. Este ye’l casu de les 144 fotografíes donaes pola familia García Álvarez, de Xixón, la selmana pasada. Na so mayoría son semeyes de familia: bodes, Primer Comunión, grupos familiares, fiestes, Antroxu, emigrantes en Cuba, escolares, etc. Tamién hai una semeya de “un grupu d’obreros gráficos de les Sociedaes d’Uviéu y Xixón” en 1908. Toes estes fotografíes fueron feches ente 1865 y 1960 en Xixón, Uviéu, Cangas, Vigo, Cuba, etc. Dalgunes d’estes semeyes son mui interesantes.
Pero lo singular d’esti conxuntu son les numberoses fotografíes qu’hai de futbolistes y de partíos de fútbol. La razón ye que’l padre d’una de les donantes, María Luisa García de Frutos, de Xixón, foi José Luis García Álvarez “Pipi” (Xixón, 1916-1990), futbolista, estremu izquierdu que xugó trés temporaes nel Sporting de Xixón (1935-36, 1939-40 y 1940-41) y una nel Real Uviéu (1941-42). Tamién xugó nel Club Cantábricu, el Hispania y el Oriamendi. Amás de futbolista foi imprentador, y col so padre y otros dos hermanos, trabayó na imprenta La Industria, de Xixón, que yera de la so propiedá.
José Luis García Álvarez formó una colección de semeyes de futbolistes y d’equipos, asina como imaxes de partíos, de los años venti al cincuenta del pasáu sieglu XX. Nesa colección destaquen 22 semeyes individuales de futbolistes realizaos polos fotógrafos xixoneses Constantino Suárez (1899-1983), Mars (José A. Muñiz Ervesún, 1892-¿?) y otru desconocíu ente 1922 y 1936, que constitúin un pervalible testimoniu del ésitu social d’esti deporte y de los sos xugadores, qu’empezaron nesos años a facese esta clase de semeyes pa repartir ente los aficionaos.
Estes donaciones son la resultancia del espardimientu del patrimoniu fotográficu que lleva a cabu’l Muséu del Pueblu d’Asturies y del ésitu de la esposición “Xixón/Xixón. Epicentru fotografia, 1858-1992” (Palaciu de Revillaxixéu, Xixón/Xixón), que nesti mes d’agostu ta teniendo xuna media de visitantes de más de quinientes persones al día.
