El calendariu pa 2024 del Muséu del Pueblu d’Asturies y la Oficina de Normalización Llingüística del Conceyu de Xixón ta dedicáu a la Feria de Muestres. Titúlase«De feria per Xixón» y fízose pa conmemorar los cien años de Feries de Muestres en Xixón. La primer feria celebróse en 1924. Nesta primer dómina celebráronse ocho, hasta 1931. Volvieron a organizase a partir de 1965 y siguen hasta anguaño. En 1967 taba asitiada nel espaciu donde güei ta‘l Recintu ferial Luis Adaro, y en 1968 inauguróse’l Muséu del Pueblu d’Asturies a la so vera y por iniciativa de la Cámara de Comercio, Industria y Navegación de Xixón.
El calendariu fai un percorríu pela Feria de Muestres al traviés de trece semeyes qu’amuesen los distintos llugares onde se fizo, les carauterístiques de los puestos, el crecimientu del Recintu Ferial Luis Adaro y los visitantes. Los autores de les imáxenes son Constantino Suárez (Xixón), Laureano Vinck (Xixón), Vegafer (Fernando Vega Fernández, Xixón)), FOAT (Fotografía Aérea y Terrestre, de Bilbao), Nebot (José Manuel Nebot, d'Uviéu), José Muñiz (Turón), Luis Argüelles (primer director del Muséu del Pueblu d’Asturies), Foto Acuña (Xixón) y hai delles anónimes. Toes pertenecen a la colección del Muséu del Pueblu d’Asturies, que contó nesta ocasión cola collaboración de Fernando Adaro de Jove, que cedió al muséu la coleición de semeyes de so padre Luis Adaro Ruiz-Falcó.
El calendariu va apurrise de baldre na recepción del Muséu del Pueblu d’Asturies y na
del Centru de Cultura Antiguu Institutu dende güei llunes 11 d’avientu, hasta acabar
esistencies.
