El cursu escolar 2020-2021 yá tien fecha d’entamu. La Conseyería d’Educación aprobó esti llunes el calendariu escolar pal cursu viniente, qu’en Primaria va empezar el 10 de setiembre y en Secundaria y otres enseñances, el 14. Les clases van rematar los díes 21 y 23 de xunu, respectivamente. Los periodos más amplios de vacaciones fíxense del 23 d’avientu al 8 de xineru, coincidiendo cola Navidá, y del 29 de marzu al 5 d’abril, por cuenta de la Selmana Santa. En total, va haber 177 xornaes lectives.
La propuesta, bien asemeyada a la del cursu actual, foi consensuada colos comités de direcciones d’Infantil y Primaria y de Secundaria, sindicatos d’educación y les federaciones d’Asociaciones de Madres y Padres Miguel Virgós, FAPA Xixón y Concapa. La Xunta de Personal Docente amosóse en desalcuerdu.
El calendariu, que se va publicar nes próximes selmanes nel Bopa, inclúi como non lectivos el 30 d’ochobre y los díes 15 y 16 de febreru. Per otru llau, permite a los centros escoyer llibremente otres dos xornaes non llectives más, acordies con los sos conseyos escolares municipales. D’esta miente, l’alumnáu de Primaria va cuntar con 69 díes de clase nel primer trimestre, 53 nel segundu y 55 nel terceru. Nel casu de Secundaria, va tener 67 díes lectivos nel primer períodu, 53 nel segundu y 57 nel terceru.
N’otros niveles educativos, el cursu va empecipiar nes siguientes feches:
- 18 de setiembre: Formación Profesional presencial, enseñances artístiques elementales y profesionales y enseñances artístiques cimeres.
- 24 de setiembre: Formación Profesional básica.
- 1 d’ochobre: enseñances deportives de réxime especial.
- 5 d’ochobre: Formación Profesional a distancia, educación de persones adultes y enseñances oficiales d’idiomes.
- Les feches de finalización de les clases nesos niveles son les siguientes:
- 26 de mayu: enseñances oficiales d’idiomes y enseñances artístiques superiores
- 21 de xunu: enseñances artístiques elementales
- 23 de xunu: Formación Profesional presencial y a distancia, Formación Profesional básica, enseñances deportives de réxime especial y educación de persones adultes.
