El Gobiernu d’Asturies ta rematando’l nuevu Programa de Prevención de la Ludopatía, que va desenvolvese ente 2022 y 2024 y va incidir nel ámbitu educativu, con acciones pa fomentar vezos d’ociu saludable, y nel sanitariu, por aciu midíes empobinaes a una atención terapéutica afayadiza.
El Conseyu del Xuegu del Principáu d’Asturies, órganu consultivu d’estudiu y asesoramientu en materia de casinos, xuegos y apuestes, axuntó güei n’Uviéu pa encarar les últimes novedaes nel sector. Mientres l’alcuentru, presidíu pola directora xeneral de Patrimoniu y Xuegu, Belén González, l’Alministración dio cuenta de les midíes propuestes pol grupu de trabayu de prevención de la ludopatía pa la ellaboración del nuevu programa 2022-2024.
El plan, que ta na recta final d’ellaboración, va aprobalu’l Conseyu de Gobiernu. Los trabayos impulsaos pol Principáu pa diseñar esti programa partieron de la esperiencia desenvuelta al amparu del anterior, que foi una iniciativa pionera n’España.
Les propuestes contemplen midíes de formación y información, d’educación, de control y inspección y d’atención sanitaria, y incluyen cuestiones como estes:
- Estratexes de sensibilización y concienciación empobinaes sobre manera a xente mozo y families.
- Actividaes de formación a diversos colectivos (fuerces y cuerpos de seguridá, emplegaos públicos, profesoráu y personal d’empreses de xuegu) que garanticen la conocencia de la llexislación en materia de xuegu y apuestes, sobre manera la relativa a les prohibiciones d’accesu y práctica, asina como sobre mecanismos de detección de comportamientos de riesgu y recursos p’atender los trestornos asociaos al xuegu.
- Actuaciones n’ámbitu escolar, cola mira d’impulsar vezos de vida afayadizos y promover l’ociu saludable.
- Acciones n’ámbitu de la inspección y control rellacionaes col protocolu de menores y prohibiciones, la interconexón de rexistros d’interdicciones d’accesu al xuegu y la ellaboración d’un plan d’inspección con atención especial a colectivos vulnerables.
- Iniciatives dende l’atención sanitaria, que contemplen midíes empobinaes a facilitar atención terapéutica afayadiza nel Serviciu de Salú a les persones afectaes por un trestornu de conducta del tipu de les adicciones ensin sustancia (ludopatía) y al so entornu.
Asina mesmo, diose cuenta al conseyu d’otres cuestiones como les midíes adoptaes n’aplicación del decretu aprobáu en febreru pol que s’establecieron los criterios que rixen pa la concesión d’autorizaciones en materia de xuegos y apuestes na comunidá.
La prórroga del conveniu col Ministeriu del Interior, pol que s’adscribe un Grupu d’Inspección de Xuegu al Principáu, y la memoria anual en materia de xuegu y apuestes fueron otros puntos encaraos mientres la xunta.
El Conseyu del Xuegu fórmenlu representantes de l’Alministración autonómica, organizaciones sindicales y empresariales, la Federación Asturiana de Conceyos, asociaciones de persones con ludopatía y colectivos de consumidores y usuarios.
