El Gobiernu d’Asturies presentó güei el Programa pa la Prevención de la Ludopatía 2022-2024, que va centrar los esfuerzos nos ámbitos educativu y sanitariu, y nos llabores d’inspección y control. El Principáu reedita asina esta iniciativa pionera n’España, yá que cuando se punxo en marcha’l primer programa, en 2018, nenguna comunidá disponía d’una ferramienta d’estes característiques.
La inversión directa prevista pa tola vixencia del plan xube a 622.365 euros, a lo qu’habría que sumar toes aquelles acciones que se van llevar a cabu con recursos propios.
La conseyera de Facienda, Ana Cárcaba, presentó güei les principales llínees del programa xuntu cola titular d’Educación, Lydia Espina, y el conseyeru de Salú, Pablo Fernández Muñiz, con motivu del Día Internacional del Xuegu Responsable, que se celebra’l 17 de febreru. Mientres les sos intervenciones, esplicaron que’l programa contempla, amás de midíes nos planes educativos y sanitarios, acciones de formación, información, control ya inspección, como les siguientes:
– Estratexes de sensibilización y concienciación empobinaes fundamentalmente a población nueva y families.
– Actividaes de formación a diversos colectivos (fuerces y cuerpos de seguridá, emplegaos públicos, profesoráu y personal de la empreses de xuegu) que garanticen la conocencia de la lexislación en materia de xuegu y apuestes, cuantimás, la relativa a les prohibiciones d’accesu y práctica, según sobro mecanismos de detección de comportamientos de riesgu y recursos p’atender los trestornos acomuñaos al xuegu.
– Actuaciones nel ámbitu escolar, coles mires d’impulsar vezos de vida fayadizos y promover l’ociu saludable ente l’alumnáu.
– Acciones nel ámbitu de la inspección y control rellacionaes col protocolu de menores y prohibíos, la interconexión de rexistros de interdicciones d’accesu al xuegu y la ellaboración d’un plan d’inspección con especial atención a colectivos vulnerables.
– Iniciatives dende l’atención sanitaria, que contemplen midíes empobinaes a apurrir l’atención terapéutica fayadiza nel Serviciu de Salú (Sespa) a les persones afectaes por un trestornu de conducta como l’adicción ensin sustanza (ludopatía) y a la so redolada.
El primer Programa de Prevención de la Ludopatía enllargóse un añu más de lo previsto, de resultes de la pandemia, la situación sanitaria obligó a retardar distintes actividaes programaes. La puesta en marcha del segundu programa garantiza la continuidá de les polítiques empecipiaes en 2018.
Nesti sen, la conseyera de Facienda valoró’l trabayu desenvueltu dende’l Serviciu de Xuegu del Executivu autonómicu nos últimos años. En concretu, destacó’l decretu d’ordenación del sector aprobáu va un añu, que dexó, ente otres cuestiones, establecer restricciones en materia de xuegos y apuestes y afitar los criterios que rixen la concesión d’autorizaciones n’Asturies. Con esa norma, el Principáu buscaba una crecedera ordenao y sostenible del ámbitu del xuegu, con una ufierta respetuoso y responsable, que tuviera en cuenta la imprescindible protección de los colectivos más vulnerables, según la viabilidá de les empreses y la calidá del empléu.
