El pabellón d’Asturies na Feria Internacional de Muestres d’Asturies (FIDMA) recibió 30.761 visites na primer selmana d’esti eventu, una cifra que confirma la escelente acoyida que recibió la esposición Asturies ye agua. Cerca del 80% de los visitantes averáronse al recintu pela tarde y nueve de cada diez veníen de la comunidá.
Amás, mientres los primeros siete díes de feria la organización repartió 13.000 vasos conmemorativos de la esposición, un fechu que lu convierte nunu de los regalos estrella d’esta edición de la FIDMA. Pa llogralo, les persones interesaes han de participar viviegamente na amuesa y responder a una serie d’entrugues sobre los conteníos. Tamién tuvieron muncho ésitu’l simulador de la empresa Excade y la aquaneta cedida por Facsa, instalaes nel esterior del pabellón.
A lo llargo d’estos díes, el pabellón allugó talleres, cuntacuentos y distintes presentaciones. Ente los próximos eventos previstos, destaquen los actos de celebración del Día del Agua, el próximu miércoles, 14 d’agostu. Amás d’actividaes de calter infantil, va presentase’l Clúster de l’Agua, una agrupación auspiciada pola Conseyería de Transición Ecolóxica, Industria y Desenvolvimientu Económicu, na que participen empreses públiques y privaes, consorcios y entidaes venceyaes al ciclu integral del agua.
Tamién se va celebrar una mesa redonda sobre deporte inclusivu en mediu acuáticu, na que va participar Carmen López, bicampeona mundial de surf adaptáu individual y por equipos.
