El Parador de Xixón va reabrir les sos puertes el próximu 25 de xunu. L’establecimientu peslló al públicu’l 15 de marzu énte l’andanciu de coronavirus. Una vegada empecipiada la desescalada de les midíes de confinamientu, la cadena pública decidió reabrir al públicu tolos Paradores. Mientres los meses de zarru aprovechóse pa reforzar tolos protocolos d’hixene y seguridá. L’oxetivu de la cadena pública ye convertise nel destín turísticu más seguru pa velar pola seguridá de los sos emplegaos y veceros.
La mayoría de los Paradores asítiense en llugares apartaos, llueñe del turismu masificáu, y casi toos ellos son medianos o pequeños. Esto facilita l’establecimientu rigorosu de los controles de seguridá ya hixene. «Somos un destín de confianza. Reforcemos los nuesos protocolos d’hixene y llimpieza por que los nuesos veceros cunten coles máximes garantíes de seguridá”, destacó Óscar López, presidente de Paradores.
La cadena pública celebra la so reapertura con un preciu especial de 65 euros. La ufierta ye válida pa estancies pa dos persones dende’l 25 de xunu hasta’l 31 de xunetu. Esta promoción ta yá a la venta pa los Amigos de Paradores -programa de fidelización de la hotelera- y a partir del 30 de mayu pal restu de veceros. Trátase d’una ufierta pensada pa tol públicu, especialmente pa les families. Los menores de 12 años van tener a la so disposición una cama supletoria ensin costu. Tamién hai opción d’acutar l’almuerzu por 12,5 euros per persona y los neños d’hasta 12 años por 6,25 euros, según un descuentu del 20% sobro’l total de factura nel restorán (bebíes non incluyíes).
